08‏/12‏/2008

لبيك اللهم لبيك




لبيك اللهم لبيك



لبيك لاشريك لك لبيك



إن الحمد والنعمه لك والملك


لا شريك لك



ازيكم جميعا يارب تكونوا بخير وبألف صحه وسلامه



وكل سنه وإنتوا طيبين




وربنا يخلي كل سنه جميله عليكم



ويجعل أيامنا كلها أعياد


فرمان مهم :



نظرا للعيد ...



وتواجد الناس الجميله قوي الي شرفتني



الي بجد بحترمهم جدا



إتأجل قرار إالانسحاب من الاراضي البلوجريه



وديه تهنئه مني ليهم جميعا



وبهدي باقه ورد كبيره ليهم




إيه ( حد بيقول لحمه ) يالهوي


لا انا بقول الورد أحسن :)


ده حتي اللحمه مضره بالصحه


وكل سنه وانتوا طيبين

24‏/11‏/2008

أخر قرار



السلام عليكم ورحمه الله وبركاته

الحمد لله والصلاه والسلام علي رسول الله صلي الله عليه وسلم


رغم اني عارف ان زواري مش كتير


ومش حد كتير بيهتم بيا ولا بالي بكتبه


ورغم إني مش معروف


الا إني توصلت لقرار نهائي


انا هقفل المدونه يمكن لفتره


ويمكن للأبد


بشكر كل شخص أهتم بالي بكتبه


وكل شخص شرفني بالزياره وبرأيه الكريم


وبشكر كل الي أهتم إنه يعرفني


وبشكر إي حد جرح فيا أو أهانني


وإخر حاجه هنزلها القصيده الي جايه


إنتظروها


أخوكم .. وربما ..


صديقكم

15‏/11‏/2008

تأتي الرياح بما لا تشتهي الانفس


عنوان غريب لكن الاغرب المغزي خلينا نشوف :


ساعات أبقي هموت وأنام لكن مش قادر أنام


وساعات أكون تعبان جدا وشبه نايم لكن مش عايز أنام


ساعات تبقي عايز الايام تعدي بسرعه


تلاقي نفسك بتعد الدقايق والساعات


وسعات تبقي عايز الايام متمرش


وتلاقي الايام عدت بسرعه جهنميه

كتير تبقي يائس ومش عايز تذاكر ومتذاكرش وتنجح


وكتير تبقي متفائل ومذاكر كويس وتحل تيأس وتسقط





ساعات تبقي جعان لكن ملكش نفس والاكل قدامك


وساعات تبقي جعان ونفسك مفتوحه علي الأخر ومش لاقي أكل


كتير من كتر الفضا والفراغ تبقي قرفان وعايز تشغل وقتك وتشتغل


وكتير لما تشتغل تبقي قرفان ونفسك في يوم راحه من غير شغل


في ناس تبقي قدامها حاجه حلال تعملها تندم


وناس ممكن يكون قدامها حاجه حرام تعملها ماتندمش


لما ييجي الصيف الناس تقول ايه القرف ده هو إمتي هيخلص وييجي الشتا


ولما الشتا ييجي الناس تقول إيه البرد ده هو إمتي هيخلص وييجي الصيف


في ناس ربنا يرزقها بأصحاب صالحين ويدوروا علي الفسدانين ويلقوا كتير ويبقوا منهم


وناس ربنا بيبتليها بأصحاب فسدانين ويدوروا علي أصحاب صالحين ونفسه يبقي منهم مايلاقيش



لما أبص لموبايلي القديم أقول نفسي في حاجه أحدث


ولما أبيع الموبايل القديم وأشتري الجديد أشتاق لموبايلي القديم


مره جحا حاول يعلم إبنه درس أخد إبنه والحمار ونزلوا الشارع :


ركب الابن وساب جحا الناس قالت : شوف الولد الي معندوش أدب


راكب وأبوه ماشي علي رجليه


نزل الولد وركب جحا الناس قالت : بص الراجل الي معندوش قلب


راكب وسايب إبنه يمشي


نزل جحا وإبنه ومشيوا جنب الحمار الناس قالت :بص الناس الهبله


الي جايبه الحمار ومش بتركبه


ركب جحا وإبنه علي الحمار الناس قالت : بص الناس الي ماعندهمش رحمه




اخر ما زهقوا نزل جحا وإبنه وشالوا الحمار الناس ضحكوا وقالوا :



بص الناس المجنونه ديه الي شايلين الحمار




ده مغذي تاني .. لكن بالذمه مش كان معايه حق لما قلت




( تأتي الرياح بما لا تشتهي الانفس )


.....



بالمناسبه بعد ما كتبت البوست ده بكام يوم


كنت بتكلم مع واحد فقالي :


لما تكون عايز تاكسي ماتلاقيش تاكسي راضي يقف


ولما تكون مش عايز تلاقيهم بيجروا وراك


ضحكت وجوايا بيقول ( تأتي الرياح بما لا تشتهي الانفس )



تمت



.........

02‏/11‏/2008

نصيحه



مش هطول .. كام كلمه بس يارب يوصلوا


لكل أب .. ولكل أم


أزرعوا الحب بين أولادكم


أذا جبت لعبه لواحد .. لازم تجيب للتاني


إذا مدحت حد فيهم لازم تمدح الباقييين


لو حتي طبطبت أو بوست حد فيهم


لازم تبوس وتطبطب علي باقي الاولاد ...


بلاش كل أم وكل أب يتخانقوا مع بعض قدام أولادهم


لازم يحفظوا أحترامهم قدام أولادهم ..


محدش يجرأ الطفل عليه ولا علي غيره


لأن ده بيسقط أحترامهم في عيون أولادهم


و بكده هيتجرأ علي الكل


وأزرعوا الحب والترابط بين أولادكم..


ديه نصيحه بسيطه


لكل أب وأم .


لكن أتنين متجوزين جديد..


أو حتي نصيحه مستقبليه لأتنين مخطوبين ...


صدقوني ديه نصيحه غاليه ..


ولازم نعمل بيها عشان ميحصلش


ما لا يحمد عقباه !!


في النهايه أحب أقول :


عليكم أنكم تراعوا ربنا في تصرفاتكم


وأزرعوا الحب والترابط في كل مكان


نصيحه بقولها ورزقي علي الله


في كلام كتير مش بنهتم بيه


وفي لحظه واحده بنعرف قيمته


لما يكون الوقت فات ....


تمت






02‏/10‏/2008

ياليله العيد




الله أكبر .. الله أكبر .. الله أكبر





لا اله الا الله


الله أكبر ..الله أكبر .. ولله الحمد




وصلي الله علي سيدنا محمد النبي


وعلي اله وصحبه وسلم


الله أكبر كبيرا .. والحمد لله كثيرا


وسبحان الله بكره واصيلا




لا اله الا الله ..


وحده .. صدق وعده .. ونصر عبده


وأعز جنده ..وهزم الاحزاب وحده


لا اله الا الله ..





ولا نعبد الا إياه مخلصين له الدين


ولو كره الكافرون


اللهم صلي علي سيدنا محمد


وعلي أل سيدنا محمد


وعلي أصحاب سيدنا محمد


وعلي أنصار سيدنا محمد


وعلي أزواج سيدنا محمد


وعلي ذريه سيدنا محمد وسلم تسليما كثيرا


تسليما كثيرا


كل سنه والامه الاسلاميه بخير


وكل سنه وانتوا طيبين


يارب ايامنا كلها تبقي أعياد


وكلوا كحك بس مش كتير






لحسن بطونكم توجعكم


يارب ايامنا كلها تبقي أعياد
وكل سنه وانتوا طيبين

13‏/09‏/2008

أوعي تزعلهم


كل سنه وأنتوا طيبين



وحشتوني جدا



بما أننا في أيام كريمه قولي بقي



بكيت أمك كام مره وزعلتها



تعبت أبوك كام مره وغلبته قد إيه



طبعا كلام ربنا عن الوالدين أكبر دليل



علي إن الاب والام رموز مينفعش نهدمها



لكن نقول عاملهم في الله



أكسب رضاهم في الدنيا هتسعد حياتك



وبيهم تسلك طريق للجنه



شخص عزيز عليا مره قالي



سوري في التعبير



لو الاب والام ضربونا بالجزمه





نمسك الجزمه ونديهالهم ونقولهم



إضربوا تاني .. مش هننطق




لأزم نستحملهم



وكله سلف ودين .. كما تدين تدان



لو كنت بتعاملهم وحش ..



ربنا هيديك الي يخلص منك



وإذا كنت بتعاملهم كويس



هيقعدلك وربنا هيرزقك بالذريه الصالحه



ودلوقتي يلا بالأمر :



كل الي مزعل أمه يروح يبوس ايدها




ويقولها سامحيني يا ست الحبايب



مش هعمل كده تاني ولا هزعلك تاني





( مش عيب إنت في نظرهم دايما طفل )




والي مزعل ابوه يروح يقوله ما تزعلش







يا أبويا



وكمان عشان الايام الكريم



وعشان ربنا يرضي علينا


ويكرمنا في حياتنا



قال تعالي :



( وقضي ربك ألا تعبدوا الا إياه وبالوالدين إحسانا )



وقال تعالي :



( وقل ربي إرحمهما كما ربيان صغيرا )



صدق الله العظيم



وسئل نبينا الكريم صلوات الله وسلامه عليه



يارسول الله من أحق الناس بحسن صحابتي ؟؟


قال : أمك


قال : ثم من ؟؟


قال : أمك



قال : ثم من ؟؟؟



قال : أمك



قال : ثم من ؟؟؟



قال : ابوك




صدق رسول الله صلي الله عليه وسلم




كل سنه وانتوا طيبين




ورمضان كريم



أعاده الله علي الامه الاسلاميه



بالخير واليمن والبركات




02‏/09‏/2008

رمضان كريم




السلام عليكم ورحمه الله وبركاته




كل سنه وأنتم طيبين




بصراحه انا حبيت أنزل بوست بسيط




انا بصراحه شايف ان رمضان للعباده




فخلينا نلتفت للعباده ومحاوله كسب الشهر




أفضل من اي بوست




وإن شاء الله وقت ما هقدر انزل بوست




هتلاقوني في وشكم



بس يارب انتوا الي متنسونيش ..


أعاد الله هذا الشهر علي الامه الاسلاميه بالخير واليمن والبركات




وكل عام وأنتم بخير
ورمضان كريم

07‏/08‏/2008

أسمعنى مره يابا



انا شعرى شاب عجزت قبل الاوان




انا والنور ليه مش لاقيين لينا مكان




الارض مش شايلانى ولا حتى الزمان





أه يابا.. أسمعنى مره يابا ..







اه يابا.. ده إحنا عايشين فى غابه ...








الورد قبل ما يطلع بتقطعه الديابه






والشمس غطت نورها يابا الف سحابه




زمن مبيرحمش الغلابه




اه يابا ..اسمعنى مره يابا ..




اه يابا.. ده إحنا عايشين في غابه...





الناس ما تعرف ليه بتاكل بعض





والقسوه ليل ونهار بتبقى الرد






اه يا قلوب الحجر الى تصد




يوم السؤال مش هتلاقوا الاجابه





اه يابا.. أسمعنى مره يابا.



اه يابا.. دا احنا عايشين في غابه..


video

22‏/07‏/2008

المرايــــــه




هتعمل ايه لو نمت يوم وصحيت بصيت


وشفت نفسك فى المرايه بكيت



جواك سؤال تصرخ تقول انا مين .. أنا مين

انا زى ما أنا.. ولا أتقسمت أتنين

وبعدين .. بعدين



قول يالى فى المرايه فهمنى ايه الحكايه

فرحان.. تعبان.. مرتاح .. ندمان

حاجات كتير فى حياتنا أتثبتت فى حيرتنا

وأدينا عايشين راضيين


جايين.. و..رايحين


هتعمل ايه لو نمت يوم وصحيت ولقيت


أقرب ما ليك فى الدنيا مش حواليك



هو أنت مين الى عمل كده فيك .. كده فيك



مش أنت ولا فى حد غمى عينيك


وبعدين .. بعدين

قول يالى فى المرايه فهمنى ايه الحكايه

فرحان.. تعبان.. مرتاح ..ندمان

حاجات كتير فى حياتنا أتثبتت فى حيرتنا

وأدينا عايشين راضيين
...................................
تهنـــــــــئه
...........

الف مبروك للصديقه العزيزه / Black Angel

النجاح والليسانس ويارب يجعل كل أيامك أفراح

ويبعد عنك الحزن وربنا يوفقنا جميعا

لما يحب ويرضى ومبارك نجاحك

ويارب قريب أفرح فيكى وتتجوزى قريب

ههههههههههههه

أجمل التهانى وعقبالنا جميعا

15‏/07‏/2008

طالت غيبتي


يا أصدقائى أجيبونى .. كيف حالكم


فقد طالت غيبتى .. وكثر أشتياقي لكم


فحالى كل ليله .. تاره حزين وأخري شارد أفكر بكم


فأتذكر ضحكتنا .. وجلساتنا ولحظات أكتئابى وأكتئابكم


واقلب فى صورنا .. فيذهب حنينى وأشتياقى الى صوركم


فكم يتوق قلبى .. وكم يفكر عقلى فى أن يراكم ويذهب الى مكانكم


فتذوب الكلمات .. وتولد العبرات ثم أتناسي بأنشغالى وأنشغالكم


فكثيرا ما أنظر كثيرا .. الي هاتفي منتظرا فى لهفه لسؤالكم


وللغيره دورها حين أري.. اصدقاء يتوادون ويتسامرون فقلبى يثور لمناجاتكم


والغربه دمار .. وبالاحزان أستعمار فأين الاستقرار فهل لي غيركم


فالأن الوحده هى الصديق ..والصبر هو الطريق الذى يهون على نفسى فراقكم


فيا أصدقاء الأمس واليوم .. والغد أن شاء ربنا فلا تنسونى أستحلفكم بربكم


أهداء/ الى أصدقائى الغاليين

29‏/06‏/2008

أعمل أيه




حاله جديده الشخص ممكن يمر بيها .. مشاكل مستمره فى البيت

ملهاش حل .تفكر فى كل الطرق متلاقيش حل غير عند حد واحد

ربنا متقدرش تعمل أي حاجه غير أنك تصلى وتدعي وتستنى فرج الله

وأنت متمرر وحالتك النفسيه فى الحضيض ولا عارف تفكر أو تعمل أي حاجه

والمشكله أنك بتلاقي نفسك جوه المشاكل من غير حول منك ولا قوه

تتحاشاها تلاقيها زى ظلك .. ولما تخلص من حمل ولسه بتقول الحمد لله

تلاقى مليون حمل .. وكل ذنبك هو أنك منسوب للعيله ديه

بجانب المشاكل العائليه الى جوه البيت ..

تحاول طبعا تطلع بره البيت تهج يعنى تفرج عن روحك شويه

يمكن تتناسي شويه .. قبل ما ترجع من تانى للقرف والنكد والمشاكل ..

تلاقي أنك بقيت مركز للركلات والصفعات حتى من أصحابك ...

تكون مع أصحابك كل حاجه أخ .صديق . ناصح . مرشد . أمين

صريح .مؤنب ..وتتحملهم على قد ما تقدر ..

في لحظه فرحهم تضحك كما لو كان فرحك أنت

وساعه حزنهم وألمهم تكون فى الحزن قبلهم

وتداوى ألمهم وتمسح دمعهم .. وتخلى نظرتهم للحياه ورديه

ولحظه حزنك ومشاكلك وألمك .. تلاقى محدش طايقك

محدش طايقلك كلمهم .. محدش عايز يستحملك ..

محدش فاضيلك..مفيش حد حواليك

على اكتافك أحمال كتير وهما بيرموا كل الاحمال عليك

وأنت تصبر وتستحمل وتقول معلش .. دول برضه اصحابك

لو أنت مستحملتهمش مين هيستحملهم .. ومين هيشيلهم فى زنقتهم وضيقتهم

وبرضه متلاقيش حمد ولا شكرانيه ...

وفي عز ما أنت غرقان فى المشاكل

يوصلك ان الصاحب ده بيتكلم عليك بالوحش

وبيحرض عليك ناس .. وغيره يعاملك معامله زفت من غير سبب

وغيره نازل تلطيش فيك من غير ذنب أو بذنب واحد

أنك بتنصحه

وتقول أن كل التصرفات الى بتحصل من أصحابك

لو كنت أنا مكانهم وعملت انا معاهم كده محدش هيستحملنى

ولو ساعه واحده

مرحله جديده الواحد بيمر بيها بيأنب نفسه عليها

وعلى كل الى فيها والى كان فيها .. بيصفي حسابه

مع نفسه ثم مع غيره ..وهيعيد أتخاذ قراراته

الي أتساهل كتير فيها عن حقه .. لكن لكل شيء حدود

لكن تعمل ايه مع ناس مبدئهم في الحياه ..

: انا ومن بعدى الطوفان :

لا وأيه والمصايب لما بتهل بتهل دفعه واحده..

لكن مفيش غير الحمد والصبر والدعاء وأنتظار

عدل وفرج الله

بيتهيقلى مش هينفع أحس الاحساس ده وقت تانى

أو أنى أتخيل شعور الشخص الى بيحصل معاه ده كله

لأن ببساطه شديده جدا ....

( انا الشخص ده )

04‏/06‏/2008

تسقط ...السياسه


ناس كتير من الى بتدخل مدونتى ممكن تحس او تشوف انها هايفه


أو أنى انسان هايف او ميولى هايفه


وده طبعا لأنى مش بتكلم فى السياسه


ماهو انا أكيد هكتب فى يوم موضوع سياسى


بس انا مش عايز تبقى مدونتى سياسيه لعده اسباب


اولا : لأن اغلب المدونات سياسيه


ثانيا: انى لما بتكلم مع اصحابى فى السياسه


بكتئب من الحال الزفت الى البلد عليه


ومن المستقبل المهبب الى هتبقى عليه


فكمان مش عايز انكد على الى بيقرا


ورغم انى عارف ان الى بيقروا مدونتى قليلين قوى


وأن التعليقات ضعيفه قوى


وان الى يعرفوا مدونتى اصلا قليلين


الا أنى مش بتضايق


ولا بحب أنى أغير اهتماماتى او مسار المدونه


عشان اكسب شهره أو الفت الانظار


انا بحب تكون موضوعات المدونه متنوعه


ومنها كمان السياسه



فى الاخر أحب أبعت تهنئه :


كل سنه وانت طيب يا أدم


وعقبال ميت سنه


ودايما تبقى معانا بمشيئه الله


وبتمنالك حياه سعيده


وحاضر جميل ومستقبل جميل وهادى


واعتبر التهنئه والاهداء ده هديه بسيطه


وده الى قدرت اقدمه

25‏/05‏/2008

لحظه من فضلك


أسئله لأختبار الذكاء :


حضر ورقه وقلم وأحسب معدل ذكائك...


1_بتقعد كام ساعه قدام الكمبيوتر والنت



2_بتقعد مع أصحاب كام ساعه


3_بتنام كام ساعه وبتاكل في كام ساعه


4_ بتتكلم بمعدل كام ساعه مع الناس .. وفي مقابلات .. وتليفونات ونت


5_ كام ساعه في اليوم فاضيه +معدل أوقات الفراغ


دلوقتى قلى اليوم 24 ساعه


نقول 8 ساعات نوم .. 8 ساعات شغل ومذاكره وشغل البيت



8 ساعات فيهم خروج وأكل وكلام وتسليه



فين العباده فى حياتك ؟؟؟


طيب تعالى كده نحسب وقت الصلاه


دقيقتين وضوء .... 3 دقايق تقف تصلي

ها خمس دقايق هتتعبك .. طيب هما خمس صلوات



لو حسبناهم هنقول وقت الصلاه فى اليوم كله نص ساعه


أو الادق نص ساعه الا خمس دقايق لو حسبناها بنفس المعدل


طيب نحسبها من ناحيه تانيه :


ربنا مديك حواسك .. وصحتك ( ده مش قر ده حسد بس )


وناس تحبك .. وبيبعد عنك الشر .. وبيرزقك بذريه صالحه

.. وبيرزقك بفلوس ورزق .. ومش بيخذلك


والاكل.. وراحه البال والستر


ونعم كتير قوي لو قعدنا نعد مش هتكفينا سنين فى عدها ..


السؤال دلوقتي : هتستخسر في ربنا نص ساعه من ال 24 ساعه ؟؟


طيب نقول فى زمنا مفيش حد بيعمل حاجه بدون مقابل


ربنا وحده الي مش مستنى منك مقابل


طيب مش المفروض نشكر أي حد عملنا خدمه


ما بالنا بربنا الي كل حاجه بقدرته ادهالنا


مش المفروض نشكره .. وشكر الله بالصلاه وأتباع فروضه


والابتعاد عن عصيانه


لما بنكون رايحين انترفيو او لقاء عمل أو هنقابل المدير


بصراحه بنستحمى ونلبس اشيك حاجه على الحبل


ونكويها والبرفانات تتوجد وتتحط


ونبقى على سنجه عشره وننزل نقابل المدير بكل احترام


ونبقى قلقانين ومتلخبطين وخايفين نقول حاجه تزعله


وكل ده عشان نفوز بالشغل .. والدنيا كلها زايله وفانيه


طيب مش عاوز تفوز بالجنه ..ديه أركان الاسلام


الشهادتين .. أقامه الصلاه .. أيتاء الزكاه .. صوم رمضان


حج البيت لمن استطاع اليه سبيلا


يعنى الصلاه الركن التانى من أركان الاسلام


وزى ما قولنا


دقيقتين وضوء + 3 دقايق صلاه


مفيهاش تعب ولا أي حاجه وبعدين نشوف


بنضيع كام خمس دقايق فى اليوم


لماذا تجعلون الله أهون الناظرين اليكم


دلوقتي مش مكسوف من نفسك


الفرصه قدامك وربنا غفور رحيم


يلا قوم اشكر الي مديك كل النعم الي في حياتك

اشكره عشان كمان تنول النعم ديه بعد مماتك

وتفوز بالجنه ..

لازم نكون مع ربنا في كل وقت .

مش في الشده نجرى ونصلى ..وفي اللين ننسي


ولكل الاديان كله يتقرب من ربه عشان ربه يرضى عنه


التقرب من الله أول طريق الصلاح والاصلاح


الصلاه تطهر الانفس والقلوب


ها قلى بقى بعد ده كله جبت كام في الاختبار
الهم صلي وسلم وبارك على سيدنا محمد وعلى اله وأصحابه أجمعين
ومن اتبعه الي يوم الدين

20‏/05‏/2008

ورده




ورده صغيره بتشم الهوا

بتلعب وتميل مع كل نسمه

وبتشرب وتحس قطرات الندي على خدودها

عبيرها وعطرها بتطير بيه في كل مكان

وبجذرها بتلف الأرض وتصبح وتمسى على جيرانها

ومره واحده تبدأ الورده تتأثر بالجو ال حواليها

وتبدأ تقفل ورقها .. وتحس أن قلبها بيدبل

انا الورده ديه .. حاسس بحاله بأحباط

حاسس أني عايز أنعزل عن الناس

حاسس بركود ومش عايز أكتب

مش قادر أعمل حاجه ....

ملل وخنقه وزهق ...

يا خوفي لأرجع أتقوقع على نفسي من تاني

لأن الحاله ديه بتطول معايا قوي

لأن أكتئابي وحش

حزن بيحاصرني مش عارف منين ولا منين

واليأس وأخواته عمال يتملك مني .. وتوابعه من الاحباط

ربنا ما يحكم على حد .. وربنا يقف معايا

وأطلع من الحاله ديه على خير

يارب يا ورده ترجعي تفتحي من تاني

ومتقفليش ورقك من تاني

وترجعي تلعبي مع قطرات الندي

وتصبحي وتمسي على أخواتك

15‏/05‏/2008

يرحم زمان .. وليالي زمان


زمان كنا بنسمع فيه حاجات كتير .. بنشتاقلها قوي


حاجات كتير مفتقدينها .. مستنينها


ربما تستخدم اله الزمن لتأتي لهذا الزمن...



يعني :


الكبير يعطف على الصغير .. الصغير يحترم الكبير


أي راجل كبير أبونا .. أي ست كبيره أمنا



نحترمهم نسلم عليهم ..بكل أدب


لو نصحونا أو شتمونا أو حتى عنفونا


نسمع ..ونحط وشنا في الارض.. ومنردش



الناس تساعد بعض..


الناس تحب بعض ...


الناس تخاف على بعض ....


مفيش خناق .. الكل يتسامح


( والكاظمين الغيظ والعافين عن الناس والله يحب المحسنين ) صدق لله العظيم


نبر والدينا .. نحسن اليهم ..منشتمهمش



منسبهمش.. ونسيئلهم.. ونلعنهم ..


نعاملهم معامله الاسلام..


وأن حتى أستحالت المعامله


نعاملهم في الله ...


قال تعالي (وقضى ربك ألا تعبدوا إلا إياه وبالوالدين إحسانا


إما يبلغن عندك الكبر أحدهما أو كلاهما فلا تقل لهما أف


ولا تنهرهما وقل لهما قولا كريما واخفض لهما جناح الذل من الرحمه


وقل ربي إرحمهما كما ربياني صغيرا) صدق الله العظيم


نتعاون مع بعض ..


كان فيه وعي .. تفاهم .. تقدير .. إحترام


الاب يفهم عياله .. ويفهمهم الغلط من الصح


الام تحاجي على عيالها وتاخدهم فى حضنها


الاب والام يزرعوا الحب في عيالهم

كل أخ يحب اخوه .. ويخاف من النسمه عليه ...


ساعه الفرح كله يفرح ويضحك ويزغرط

وقت الحزن .. كله يقف جنب بعض

يكونوا نسيج واحد


العلم كان شرف وثقافه ومستوي رفيع ..دلوقتى ياقلبي لاتحزن


المدرس كان بيتقدس ويتشبه في رسالته بالرسل


؛ قم للمعلم وفه التبجيلا .. كاد المعلم أن يكون رسولا ؛


الطلبه كانوا بيحبوا العلم .. بيحترموا المدرسين


وبيقدروهم .. وكانت العلاقه أب بأبنه مش مدرس وطالب


دلوقتى ...........


الاصحاب بمعني الكلمه .. الدمعه واحده


الضحكه بتخرج من بق واحد


في الشده راجل واحد ..


الجيران كانوا لبعضهم


أم محمد تعمل رز بلبن تبعت طبق لأم مصطفي


أم مصطفي ترجع الصينيه فيها بسبوسه ....


مصر وطن واحد .. نسيج واحد .. ولادها كلهم راجل واحد


كل واحد مقتنع بالى في أيده وبنصيبه ..


بقى كله بيحقد ويبص للي في أيد غيره ...


المحتاج بيلاقي أكل .. ويلاقي كسوه .



ويلاقي أوضه فوق سطوح ..


تحميه من سخونه الشمس في الصيف



وبطانيه صوف تحميه من برد الشتا


يلاقي أيد حنينه تطبطب عليه


وتقوله إنت مش لوحدك في الدنيا ...





بنات الحاره كلهم إخواتنا ..


الي يعاكسهم.. كأنه إتعدي على حرمه بيتنا


الأحترام اللبس الجميل



الطرحه والبرقع واليشمك



الشياكه في الجلابيه والمنشه والطربوش


الملايه اللاف و المنديل بقويه



الحنطور .. القهوه البلدي



الراديو شغال فيه عبد المطلب ومحمد قنديل



حتي في حرب 73 كان كله بيحارب


راجل وست .. ولد وبنت


شاب وعجوز .. مسلم ومسيحي



خطبه عبد الناصر





ياسلاااااااااااااااااام لو يرجع يوم من أيام زمان


أتمني نرجع أخلاق زمان


لكن عارف اني هسمع .. برضه كلمه من كلام زمان


للست أم كلثوم ..


( عايزنا نرجع زى زمان .. قول للزمان إرجع يا زمان)


ولا لعمنا ؛عبد المنعم مدبولي؛ الله يرحمه

يرحم زمان وليالى زمان..


الناس يا متهنى يا فرحان

الدنيا كانت ورده وشمعه

ولسه مخترعوش أحزان

زمان زمان وليالى زمان ..

بعيد عن الموضوع


حاسس إني عايز أبكي قوي

12‏/05‏/2008

مدونين في الهجايص



مواقع .. منتديات ..مدونات




كلها حاجات ليها فكر وبتهدف لتوصيل أفكار للناس




او بالأخص للشباب بما أنهم أكتر ناس بتدخل على




المواقع ديه بأختلاف تصنيفها




المفروض إنها بتهدف للتواصل بين الشباب




ومختلف الاجيال وكمان بتبقى فى موضوعات نقاشيه




أكتر من رائعه .. والمفروض يبقى فيه نقاش عقلانى




على الاقل تبادل ومشاركه أفكار الهدف منها الاصلاح




والنهوض بمجتمعنا للأفضل .. لأنه مش هينهض الا على أيدينا




(ده المفروض يعنى )




لكن ده مش بيحصل دايما




بيتحول الحوار الى شيء لا يرقي لمسمي حوار




ممكن يبقى بين أتنين فى قهوه ..




أو أتنين في شارع ...




مش تقليل من كلام الناس ديه ولا تريقه




لكن الكلام بينهم بيبقي من غير حواجز




يعنى كلام على هزار على شتيمه على كله




كوكتيل






في المواقع ديه على أي موضوع بمجرد الاختلاف




نلاقى هجوم وياريت كدة وبس . وشتيمه بأقذر الالفاظ




يعنى أكتر من شارع.. وناس تقول اى كلام وخلاص




المهم تشارك ...




ولأن في الفتره الاخيره لقيت ناس معلقين




وأصحاب مواقع بيتبادلوا الشتيمه كما لو كانت




شيء عادي ودول في نظرى مش مدونين اصلا




او وجهه نظرهم باهته وغير مسنده بدليل




لأن في مقوله بتقول ( علاء صوتك يدل على ضعف حجتك )




مابالنا بالي بيشتموا والأكاده انهم هما أصحاب المواقع ديه




حاجه تكسف بجد




طيب مش المفروض يبقى فيه نقاش بناء




على الاقل ممكن حد يستفاد او يقتنع لو قراه




بلاش كده




طيب مش مواقع الانترنت من بعض أهدافها التوعيه




لأنها بتعتبر عامل او وسيله من وسائل الاعلام




الي فرضها عصرنا




والاهم يكون فيها افاده للمتلقي




والا مش هيكون ليها فايده مش أكتر من




أهدار وتضييع للوقت ؟؟؟




نداء لكل مدون فى موقع .. في منتدي




في مدونه .. ولكل معلق




ياريت نلتزم بحوار عقلاني بناء




نجني من وراه أستفاده وتبادل خبرات وتجارب




والاهم منطلعش عن شعورنا لحظة الاختلاف




والمدونين مينشروش التعليقات والردود




الى مفيهاش أفاده أو مشاركه فكريه






أتمنى ساعه أختلاف الاراء




أننا نحترم الرأي الاخر




ومادام دخلنا في نقاش




نمتثل لقاعده




رأيي صواب يحتمل الخطأ




ورأيك خطأ يحتمل الصواب




يعنى نكون مستعدين يا نقنع




يا نقتنع




ولأصحاب المواقع




بدل ما نرد على الى بيشتموا بالسب




نوضحلهم وجهه نظرنا أكيد هيقتنع حتى ولو




بينه وبين نفسه




وميبقاش مجرد أسفاف ومهاترات




وسب وتبجح




أتمنى .. ولسه بتمني




09‏/05‏/2008

أنا بتعلم منك ..


لما تقف جنب حد فى المواقف الصعبه


لما تكون دايما بتتصدى لأى حد يضره


دايما بتمسح دمعته .. دايما بتواسيه


دايما بتسمع شكوته .. وتحل معاه مشاكله


بتضحك معاه .. وتحرقك دمعته وتبكى معاه


لما تحبه قوى .. وتحس انه بيحبك قوى

...


من طبعه تعرف انه ميعرفش الكره


قلبه أبيض .. طيبته مشفتهاش فى حد


صريح .. الى فى قلبه على لسانه


...



أول ما يتمرد


تكون أنت حقل تجاربه


أول واحد يتمرد عليك


ويجرب فيك


القسوه .. الجرح


الألم.. المرار .. التعب




...


ومن قربه من قلبك


ومن معزته عندك


ومن صله قرابته ليك


للأسف .. مش قادر تكرهه



...




يتعلم فيك الشر


ويجرب .. ويجرب


لحد الاحتراف


وأنت لا قادر تكرهه


ولا قادر تجرحه

...


لو منعت عن نفسي الظلم


وواجهت..هوجعه..

ولو قسيت قلبى .. وانا مقدرش


هيغضب عليا ربي


وبظلمه هردعه


...




أديت لنفسي فرصه


أسامحه .. أعاتبه


أسمعه..



وهو لا بيقدر .



ولا بيفكر..



لكن انا فى نظره



جاحد .. وظالم...



...



وصلنا لطريق مسدود

كل ما أجي أنسي

الاقى توب شره مفرود

وكل إسفين يحصل



ألاقي كفه فيه ممدود



. . .



والمصيبه أنه طيب قوي



والى مشى وراهم بيقسوا قلبه



وبيشنعوا عليا عنده

بيقسوه عليا ويبعدوا عنى حبه



وانا لا حول ولا قوه



لكن ربنا على الظالم القوي



. . .




نفسى اقوله طهر قلبك

سيب الشر الخير اهو جنبك


والرب بيغفر ما بالك العبد


الحق نفسك .. وأبدا فكر في الحل


العمر عمال يعد


. . . . . . .


مجرد حاله من صميم قلبى


بهديها لكل أنسان قريب منى جرحنى