22‏/03‏/2018

أنا عِندي حنين ..

مساء الخير .
في الحقيقة أنا مش عارف أبتدي منين ..
عندي إحساس الشخص الي بيدخل بيته بعد ما سابه سنين ورجع لسه بيفتح الباب وبيسترجع كل شيء , وبتنتابه أحساسيس كتير , غربة وإستغراب وحنين وأحاسيس متناقضة زي إن المكان مألوف قوي بالنسباله وغريب عليه برضه في نفس الوقت , كأنه داخل مكان مليان ذكريات وحاجات متربة , مكان مش عارف إذا كانوا جيرانه لسه عايشين فيه ولا لا , مين حي ومين فارق ومين هيفتكره , ومين عزّل ومابقاش بييجي ف مش هيتقابلوا .


في الحقيقة مش عارف إيه الي رجعني , ومش عارف إيه سبب حنيني للمدونة الفترة دي .
وبرضه مش قادر أحدد السبب الي بيخليني أدورعلى الناس الي كنت أعرفها من سنين وأرجع أكلم ناس منهم .
كل شيء غريب عليا وضبابي .


مستغرب بُعدنا كلنا عن المدونات وإتجاهنا لأماكن زي فيسبوك وتمبلر وإنستجرام وغيرهم .
كبرنا وإتغيرت حياتنا وإتغير تفكيرنا , مابقيناش بنتقابل هنا في المدونات زي زمان .

 لكن باقي المكان وباقي الحنين .
يمكن ييجي على كل واحد فينا يوم يحس بحنين ويرجع تاني شوية ويمشي .

وإن عدنا ..للحديث بقية .






norahaty mo ..وداعاً

سلامو عليكم
ازيكم جميعا .. سلامي لكل الناس الي ممكن تشوف التدوينة دي وتفتكرني .
التدوينة دي مهمة بالنسبالي وواجب عليا أكتبها .
ببالغ الحزن بنعي أخت مُدوِّنة عزيزة على ناس كتير وعزيزة عليا انا شخصياً دكتورة / نجوى او حسب ما كانت مسميه نفسه norahaty  mo  .
رحلت من أيام قليلة في صمت .. وبصدمة من كل الي يعرفها .
http://norahaty2.blogspot.com.eg/


في الحقيقة أنا مش عارف أكتب ايه أو اقول ايه .
دكتورة نجوى برغم عدم معرفتي بيها في الواقع إلا إنها كانت أخت عزيزة , دايماً كانت بتزورني هنا وتسأل عني وتدعيلي .
تعليقاتها فيها دهشة أطفال وتعجُب من أحوال الدنيا  وبراءة .
طول الفترة الي عرفتها فيها ماحصش اني شوفتها إتصادمت مع حد ولو لمرة واحدة , دايما كانت محبوبة وزي نسيم الصيف الي بيهب على الناس في أمّس حاجتهم لهوا رطب , بيسيب أثر وبيمشي بنفس الخفة الي جه بيها .
حتى نقاشها كان هادي وفيه صبر ومحاولة تفهُم .

للأسف ماكنتش أعرف إنها بتعاني من مرض ما , ولأن الحياة تلاهي ف طبعا كنت منقطع عن هنا لسنين ,وحتى فيس بوك كنت قافلة ليا كتير ف مكانش فيه تواصل , والخبر الأخير الي وصلني عنها هو خبر رحيلها ..
لما رجعت هنا ببص على التعليقات الي لسه ماتنشرتش , لقيت تعليق لها كالعادة بتسأل عن أحوالي .


ماعنديش كلام تاني أقوله غير ربنا يرحمها ويعفو عنها ويعوضها بكل ذرة ألم ووجع أجر ونعيم .
ربنا يرحم قلبها الطيب ونفسها الجميلة ويصبر أهلها على فراقها .
ويطيب قلوبنا مع كل وجع وفقد عانينا ولسه بنعاني منه .
وأتمنى من كل واحد يقرا التدوينة دي يدعيلها ب الي هييجي في باله .