زمان كنا بنسمع فيه حاجات كتير .. بنشتاقلها قوي
حاجات كتير مفتقدينها .. مستنينها
ربما تستخدم اله الزمن لتأتي لهذا الزمن...
يعني :
الكبير يعطف على الصغير .. الصغير يحترم الكبير
أي راجل كبير أبونا .. أي ست كبيره أمنا
نحترمهم نسلم عليهم ..بكل أدب
لو نصحونا أو شتمونا أو حتى عنفونا
نسمع ..ونحط وشنا في الارض.. ومنردش
الناس تساعد بعض..
الناس تحب بعض ...
الناس تخاف على بعض ....
مفيش خناق .. الكل يتسامح
( والكاظمين الغيظ والعافين عن الناس والله يحب المحسنين ) صدق لله العظيم
نبر والدينا .. نحسن اليهم ..منشتمهمش
منسبهمش.. ونسيئلهم.. ونلعنهم ..
نعاملهم معامله الاسلام..
وأن حتى أستحالت المعامله
نعاملهم في الله ...
قال تعالي (وقضى ربك ألا تعبدوا إلا إياه وبالوالدين إحسانا
إما يبلغن عندك الكبر أحدهما أو كلاهما فلا تقل لهما أف
ولا تنهرهما وقل لهما قولا كريما واخفض لهما جناح الذل من الرحمه
وقل ربي إرحمهما كما ربياني صغيرا) صدق الله العظيم
نتعاون مع بعض ..
كان فيه وعي .. تفاهم .. تقدير .. إحترام
الاب يفهم عياله .. ويفهمهم الغلط من الصح
الام تحاجي على عيالها وتاخدهم فى حضنها
الاب والام يزرعوا الحب في عيالهم
كل أخ يحب اخوه .. ويخاف من النسمه عليه ...
ساعه الفرح كله يفرح ويضحك ويزغرط
وقت الحزن .. كله يقف جنب بعض
يكونوا نسيج واحد
العلم كان شرف وثقافه ومستوي رفيع ..دلوقتى ياقلبي لاتحزن
المدرس كان بيتقدس ويتشبه في رسالته بالرسل
؛ قم للمعلم وفه التبجيلا .. كاد المعلم أن يكون رسولا ؛
الطلبه كانوا بيحبوا العلم .. بيحترموا المدرسين
وبيقدروهم .. وكانت العلاقه أب بأبنه مش مدرس وطالب
دلوقتى ...........
الاصحاب بمعني الكلمه .. الدمعه واحده
الضحكه بتخرج من بق واحد
في الشده راجل واحد ..
الجيران كانوا لبعضهم
أم محمد تعمل رز بلبن تبعت طبق لأم مصطفي
أم مصطفي ترجع الصينيه فيها بسبوسه ....
مصر وطن واحد .. نسيج واحد .. ولادها كلهم راجل واحد
كل واحد مقتنع بالى في أيده وبنصيبه ..
بقى كله بيحقد ويبص للي في أيد غيره ...
المحتاج بيلاقي أكل .. ويلاقي كسوه .
ويلاقي أوضه فوق سطوح ..
تحميه من سخونه الشمس في الصيف
وبطانيه صوف تحميه من برد الشتا
يلاقي أيد حنينه تطبطب عليه
وتقوله إنت مش لوحدك في الدنيا ...
بنات الحاره كلهم إخواتنا ..
الي يعاكسهم.. كأنه إتعدي على حرمه بيتنا
الأحترام اللبس الجميل
الطرحه والبرقع واليشمك
الشياكه في الجلابيه والمنشه والطربوش
الملايه اللاف و المنديل بقويه
الحنطور .. القهوه البلدي
الراديو شغال فيه عبد المطلب ومحمد قنديل
حتي في حرب 73 كان كله بيحارب
راجل وست .. ولد وبنت
شاب وعجوز .. مسلم ومسيحي
خطبه عبد الناصر
ياسلاااااااااااااااااام لو يرجع يوم من أيام زمان
أتمني نرجع أخلاق زمان
لكن عارف اني هسمع .. برضه كلمه من كلام زمان
للست أم كلثوم ..
( عايزنا نرجع زى زمان .. قول للزمان إرجع يا زمان)
ولا لعمنا ؛عبد المنعم مدبولي؛ الله يرحمه
يرحم زمان وليالى زمان..
الناس يا متهنى يا فرحان
الدنيا كانت ورده وشمعه
ولسه مخترعوش أحزان
زمان زمان وليالى زمان ..
بعيد عن الموضوع
حاسس إني عايز أبكي قوي
هناك 7 تعليقات:
عزيزي زيزوا
أثرتني كلماتك عن الماضي ورسمت داخلي الصورة الوردية للماضي. جعلتني انظر للماضي وكأنه جنة ونعيم. أعلم أن كلامي غريب ولكن يا صديقي في هذا الزمن كان الاستعمار والإحتلال.
في هذا الزمن كان الكل فيه بيخاف من العار, لكنك يا صديقي شاعر وحساس ونجحت في ان تنقل إلي الجانب الوردي وبالفعل حببتني ان احيا هذا الزمن.
ولكن دعني أصطحبك للحاضر حتي نذهب سوياً للرحلة إلي المستقبل.
صديقي زيزوا أرجع معي الي الحاضر. أنظر حولك... العالم يا صديقي مازال هو نفس العالم ... مازلنا نستنشق الهواء ومازلنا نشرب الماء ومازلنا نأكل طعام عندما نجوع , نحن مازلنا أنسان.
الانسان الذي عاش الماضي هو الذي يعيش الحاضر. لذلك يا عزيزي
دعنا نعيش حاضرنا بقيم الماضي ونصنع من تاريخنا مستقبلاً مشرفاً.
فمن المستحيل ان نعود بالزمن ولكن المستقبل مازال في قادما.
أدعوا الله سبحانة وتعالي ان يهبنا الصبر وقوة الإحتمال والمقدره علي السير في طريق الصلاح. وان يمنحنا السكينة والسلام الداخلي الذي يساعدنا علي التغيير . وان ينشر في قلوبنا المحبة التي تستر كثير من العيوب.
أسأل الله أن يعطيك كل ما تحتاجة يا صديقي زيزو.
فأنت شخص تستحق كل خير ...
سلامي لك يا صديقي العزيز
مع تحياتي
مِثلي في طريق التعافي
بجد بجد الله عاليك الله عاليك ما اروع ما قرأت فى مدونتك وما اروع الحديث عن اجمل زمن وهوا زمن زمان الى للاسف بنقول فيه كان وكان
بعض الجمل والكلمات عندما قراتها فى مدونتك احسست ان قلبى يرتجف من كتر الشجن دى اول مرة ادخل مدونتك ومش هتكون اخر مرة ان شاء الله
تحياتى لك
زيزوووووووووو اللذيذوووووووووو
المحارب الصغير
ايه الكلام الكبير قوى ده
ده انت غلبت شعر على سلامة
ونثر الابنودى
وكسرت على صلاح جاهين
هى الحالة ايه يازيزو
انت بقيت اديب من الادباء المميزين الشباب
مدونة اكثر من رائعة
احب اقول لك بالرغم من كل اللى احنا فيه
لكن لسه بلدنا بخير
فيها كل اللى قلته وزيادة
يمكن انت مش شايفهم
لكن لو لفيت كتير حتلاقيهم موجودين
هى دى مصر
هى دى بلدنا
سيبك من اللى خاب وعاب
سيبك من اللى كاد وشاد
خليك فى ابن بلدى
اللى كل اللى فيه بيقول يامصر
تحياتى وانت على بالى لكن الحياة زحمة والواحد بيحاول ياخد فيها كام نفس راحة بين الاحباب الى زيك
والسن له حكمه يامحارب ياشاب مش حاقول ياصغير
( رجعت ليالي زمان رجعوا أهالينا )
لما تحب تحس بجو زمان بجد اسمع أغنية فيروز
رجعت ليالي زمان
وادعيلي
وادعي لها
أنا من الناس القدام أوي
بعشق ريحة زمان
الجوامع التاريخية الأثرية
الكتب القديمة
الأغاني القديمة
الكلام اللي كانوا بيقولوه
وبالمناسبة يا سيد زيزو
فأنا بدعوك لرحلة للماضي
وهلبت إنك موافق
فأنا هبعتك للست فيروز
اسمع أغنيتها
راجعين يا هوى راجعين
تحياتي
آدم
فعلا قول للزمان ارجع يا زمان هى دى احسن جملة للرد على الكلام اللى انت كتبته يا زيزو حاجات كتير يمكن الزمن لو رجع يمكن لو ماكنتش حصلت كنا استريحنا او بمعنى اصح يمكن ماكناش جينا و ده فى حد ذاته احسن او ممكن كنا عرفنا نعيش زمان بس انا عن نفسى افضل ان احنا ماكناش جينا احسن ( مش انت معايا برده ) اخوك الكبير hollowman
السلام عليكم ورحمة الله وبركاته
زيزو
مش كل زمان حلو.......
مثلا
زوار الفجر...نسيتهم
نكسة 67.....نسيتها
امراض كتير ليس لها علاج بعد....نسيتها
التاميم وقوانين الاصلاح الزراعى (الجائرة)وهذا رأىّ والتى ادت الى ما نحن فيه الان من تفتيت للارض الزراعية وديون بنوك التسليف,,,,وغيرها من مشاكل لا تعد ولا تحصى
كل ده كان زمان (وغيره كتير) ولا اعتقد اتها جميلة او لطيفة لنعود اليها
وزى ما بأقولك:
مش كل زمان حلو
ومش كل الان وحش
وتقبل تحياتى
دلوقتي ليه يا زمان مبقتش زي زمان
طيب يا صبر طيب
بس خلاص يا صبر طيب..متسألش ليه كتير يا زيزو عشان غالبا وف اوقات كتير اوي مش هتلاقي اجابات
BLACK
إرسال تعليق