14‏/06‏/2009

خبريني ( خاطره مناجاه)




خبريني يا من بالظلم مقهوره يا نفسي


لما أنتي دوما حزينه مستنهضه لدموعي ويأسي


وكيف أسئلك وأنتي مني ..وأنتي يومي وحاضري وأمسي


وكثيرا ما أناجيكي سائلا ولا تجيبي


هل أنتقم شاهرا سيفي ؟؟


أم أجتهد وأسعي علي كتفي فأسي ؟؟


فحين أضحك أجد دموعي.. للحزن سباقه وللبوح مشتاقه


وفي بكائي أجد الدمع.. قد إمتلأ منه كأسي


فأحاول الهروب .. ولكن أين الهروب ومن حولي منبع بؤسي


فتأخذني اللامبالاه وأشعر أني.. قد بعت الدنيا وزهدت فيها


وفي لحظه شرودي وتصارع أفكاري أسمع نداء.. من داخل قلبي وهمسي


فيقول صوت يدوي في أذني فيداوي روحي ..لا تيأسي من رحمه الله


لا ييأس إلا الكافرون


قم وتوضأ وصلي لربك وإقرأ من القرأن.. ما يداوي قلبك وللكرب ينسي


فوجدت الطريق ووسع صدري بعد الضيق ..فقلت حمدا لله علي نعمه الاسلام


لا أقول أني لا اشعر بالضيق ولكن لن أحزن.. فالله معي فدوما أشكره علي نعمه وأحصي


وسوف أقول دوما يارب وفقني دوما لما تحب وترضي ..فأكمل بالإيمان ما في من نقصي


فليس لي غيرك .. ولن أرجو غيرك .. ولا تحوجني لغيرك .. فهون عليا الدنيا


وقوم روحي ونفسي


.........................

ديه خاطره مناجاه كنت كاتبها من فتره كده بالظبط يوم 24/7/2008


وده طبعا نظرا لحاله الركود الراهنه



عايز اقولكم علي حاجتين الاولي تهنئه والتانيه تنويه



التنويه : من الفتره الي جايه هيكون مكاني صديقي سامح هينزل موضوعات من فكره هو


وديه فرصه عشان يتشجع يكتب عشان مطلع عيني , ياريت يا جماعه يكون فيه تفاعل


وتفضلوا تتفضلوا وتشرفوني وتناقشوه في موضوعاته


وياريت يا جماعه يكون فيه تفاعل لأنه إحتمال قريب ينضم لجموع المدونين


ياريت تشجعوه


ياريت قبل حتي ما تردوا علي البوست تقولولي رأيكم وشكل تفاعلكم مع التنويه ده


ده ضروري يا جماعه




التهنئه : للدكتور/ أحــمــد خــالــد تــوفـيق
بمناسبه عيد ميلاده الي كان يوم 10 يونيو





بجد انا أكتشفت إن الراجل ده ليه جماهيريه عاليه قوي وناس كتير قوي بتحبه


وهو فعلا يستحق أكتر من كده


بجد فعلا من أعذب وأسخر وأطرف وأقوي وأرعب وأجمل واروع الاقلام

الموجوده في الساحه الكتابيه والقصصيه



ده غير تميزه في أدب الرعب .. بجد بعشق كتاباته لدرجه إن انا واصحابي



بنردد بعض الجمل التي لا تنسي من رواياته مثل :



فى فى فو فام...بلا قافية



أشم دماء رجل انجليزى..سواء كان حيًا أو ميتًا، فلسوف أحمّص عظامه لأصنع خبزى

هؤلاء الناس الوحيدون ..من أين يأتون.. وإلي أين يذهبون
ابيض ابيض هو لون ثيابه .. ابيض هو لون أدواته
لهذا أحب اللون الأبيض
لأن حبيبي خباز
و
للأبد
ماذا ؟؟
هل ستظل تحبني للأبد
وحتي تحترق النجوم وحتي ...
و
المقوله الشهيره لــ لوسيفر
إني بكم أسعد .. ولكم قلبي يطرب

وحاجات تاني بس الواحد مخه فوت

بجد وبقولك من كل قلبي يا دكتور احمد إنت بجد كنت مربي فاضل


ايوه مربي فاضل ربيت اجيال كتير علي كتاباتك الرائعه

بقولك كل سنه وانت مبدع .. كل سنه وانت معانا .. كل سنه وإحنا بنقرالك

وكل سنه وإنت في وسطنا .. وكل سنه وإنت بتعلمنا ..

ودايما تفضل رمز من رموز الادب والكلمه

ورغم إني زعلان علي رغبتك في إنهائك لسلسله " ما وراء الطبيعه " إلا إني

بحترم قرارك الي يستحق الاحترام منعا للإسفاف وده بيدفع لإحترامي لشخصك

وبجد انا كنت مبسوط جدا لما شرفتنا في اسيوط وكان رأيك فيها كده

وكنت مبسوط أكتر بإستقبال الناس ليك بكل الحب والتقدير ده

وكنت حزين جدا لأني مقدرتش احضر الندوه واعرف حضرتك عن قرب

لكن أكيد هنستني من حضرتك زياره تانيه إن شاء الله


كل سنه وانت طيب وعقبال مليون سنه يا دكتور


وطبعا في النهايه احب اقولك إنك عمرك ما هتتنسي



وكتاباتك وروحك الجميله الساخره هتفضل جوانا

ورواياتك هتفضل عايشه معانا وهتفضل دايما في قلوبنا






العجوز رفعت اسماعيل









04‏/06‏/2009

سرقه مخ بالصدمات

السلام عليكم ورحمه الله وبركاته

يارب تكونوا جميعا بخير
أولا : انا حاسس إن البوست الي فات مأخدش حقه لكن هنزل البوست ده

بس ياريت مش هقول حد يعلق عليه لكن علي الاقل إقروه يمكن حد يستفيد
والافاده تعم .. وفقنا الله و إياكم لما يحبه ويرضاه
................

يالهوووووووي..الحقوووووني


مالك يا بني فيه إيه ؟؟

إتسرقت يا خلق

إتسرق منك إيه ؟؟

إتسرق مني شقي عمري ؟؟

فلوس .. دهب.. أجهزه قول اتسرق منك إيه ؟؟

اغلي يا أستاذ .. إهي إهي أغلي

عقلي يا أخينا .. سرقوني في قصيده



الموضوع بإختصار



بما إن الفتره الاخيره كترت السرقه قوي بين المنتديات والمدونات


الواحد اتعقد ينزل حاجه لاتتسرق


وبسم الله ما شاء الله انا فيه ناس مش بتضيع وقت متبعاني علطول


وبتسرق وتقشطني أول بأول


فقولت فرصه أنزل موضوع قديم كنت كاتبه وكنت متضايق قوي ساعتها


المهم بقي :



انا كنت كاتب قصيده إسمها ( يا قلبي لاتسل اين الدموع )في منتدي مشترك فيه لحد دلوقتي وبحبه جدا


وطبعا علشان بحبه كنت بحب اعرض الي بكتبه علي الناس هناك لأن بجد


كان فيه ناس متميزه جدا وكنت بتنبأ لهم بمستقبل جامد في الشعر والقصه


المهم القصيده الي كنت منزلها ديه مره بالصدفه كده قولت اعمل سيرش عنها


وياريتني ما عملت!!!



لقيت منتديات كتيره قوي ومدونات واخداها ما بين الي قايل انه ناقلها وما بين الي ناسبها لنفسه


وبجد حزنت قوي وقتها قولت ازاي واحد ممكن ينسب حاجه الغير لنفسه


أي كانت صوره المجهود ده لأن الامانه الفكريه بتوجب ذكر إن الموضوع منقول


وحتي إن ماذكرش المصدر يكفي كلمه "منقول "


والاغرب بقي كلام المدح والاطراء الي تلقاها الي منزلين قصيدتي


وبكل بجاحه بيردوا علي المدح كما لو كانوا فعلا كاتبينها


الي عايز يتأكد إن القصيده بتاعتي ولا لا


اولا المنتدي اسمه allmazika


وانا اسمي علي المنتدي ده كان zizozizo


وده رابط الموضوع إضغط هنا


منزلها انا بتاريخ 18/8/2007


وديه القصيده


يا قلبى لاتسل أين الدموع ..
فمن جراحك ومن عذابك الف ينبوع
الحزن أحاط قلبى واسقط كل الدروع
والحب قد هجر قلبى وتفرق فى الربوع
والغدر رغما عنى يهشم فى الضلوع
والعمر بلحظة يهرول وأنطفئت الشموع
ومن جحيم قلبى جفت الانهار وماتت الزروع
فأبحث فى داخلى فأجد انسانا قنوع
لكن غدر الزمان يلاحقنى بكل الاقطار والنجوع
وعندما أفتح كتابا أجد قصتى فى كل موضوع
لأجد بداخلة تمثالا من ألامى وأحزانى مصنوع
ولحظة وجود أهلى أشعر بأننى غصن من شجرة مقطوع
فأنا لست بأنسانا من مشاعرة منزوع
فأنى أنتظر شمسا يكن أملها السطوع
وأرفع يدى لربا غافر الذنوب فيرحم نفسى
ويغفر لعملى المرفوع
كفاك للمواجع تقليبا يا قلبى فأنه طريق غير مشروع
ولا تدعنى أردد وصوتى غير مسموع
يا قلبى لاتسل أين الدموع
....

شوفوا باقي التواريخ منزلاها أمتي وهتعرفوا مين الي صادق ومين الي حرامي


بعد ما تشوف رابط القصيده من المنتدي اعمل سيرش في جوجل


هتلاقي بالعبيط ناس منزلاها


ولا علي إيه انا هديكم اللينكات


خدوا عندكم :


عيني عينك ( فعلا سرقه عيني عينك)











ما بين الي قايل انه ناقلها والباقي بتاعتهم طبعا


والاغرب بعد ما شوفت الكلام ده كله اتضايقت قوي


وبحكي لإصحابي جه واحد فيهم وقالي إن فيه مسابقه عندهم في الكليه


عن طريق إختيار افضل قصيده شعريه


صاحبي بيقلي لقيت واحد داخل بقصيده اسمها " يا قلبي لاتسل اين الدموع "


فبيقولي استغربت قراها لقيها قصيدتي .. فبيقوله ديه بتاعتك


قاله : اه .. قاله : علي كده بقي يبقي أكيد انت زيزو


الواد سكت .. وبعد كده صاحبي قالي إن الي اخد القصيده أخد مركز اول


بصراحه فرحت وزعلت


فرحت لأني حسيت إن كتاباتي علي مستوي كويس



وزعلت لأني كنت انا أحق بالمدح والمركز الاول ده


لأني انا الكاتب ديه من افكاري يا جدعان .. والله العظيم من افكاري يا خلق


فكرت ساعتها إني اسجل القصيده في الشهر العقاري في باب حمايه الحقوق الفكريه


سمعت ساعتها إن تسجيل الحقوق ديه مش اقل من 150 جنيه


اتصدمت ساعتها وقلت يعني عشان اسجل قصيده ولا قصه قصيره ادفع كل ده


أمال لو نزلت كتاب هدفع كام؟؟


قولت حتي حمايه الفكر بقي فيها استغلال ؟؟؟


وقولت ساعتها للأمانه" يعني هي بلدنا ديه مابقتش عارفه تهلب منين ولا منين" ؟؟


وبعدها سئلت تاني وتالت فيه ناس قالتلي تسجيل الحاجات ديه سهل


وكمان مش غالي كده زي ما سئلت قبل كده ( الظاهر كانوا بيشتغلوني )


الاهم من ده كله مش انا بس فيه واحد من الي لاطشين القصيده



لاطش قصايد لناس تاني من نفس المنتدي .. انا قولت هو إيه مش بيتهد

عامل زي المنشار طالع سارق نازل سارق ومتابعنا المصيبه


وإحنا ننزل وهو يسرق ..


بس بستغرب كتير قول يعني الي بيعمل كده


مش بيستحرم مش بيفكر إن ديه برضه سرقه زي سرقه الأموال ؟؟


مش بيفكر إن ربنا شايفه ؟؟ مش بيفكر إنه هييجي يوم ويتسئل عليها؟؟


ثم انا اصلا ماقبلهاش علي نفسي إزاي أنسب مجهود غيري لنفسي


وافرح بالمدح الي هو في حقيقته نفاق ليا .. أعوذ بالله من الناس ديه


وادي لينك تاني لصديقه عزيزه من المنتدي برضه اتقشطت في كذا حاجه زيي :)


دوس هنا ( اوعي تسرق انت كمان :) )


ده الموضوع الاصلي


ودول السرقه




عيني عينك ( ايوه هو هو الي سرق الي فاتت )



وحاجات تاني كتير حتي من المدونه هنا


انا مش عارف بصراحه ايه الحل


يعني نبطل نكتب ولا إيه يعني ؟؟


ماهو لازم يكون فيه حل للحوارات ديه ؟؟


ده لسه" زيكا "صاحبه مدونه الاشعاريزم والمخرج


لسه لاغي مدونه الاشعاريزم بسبب السرقات


وناس تاني كتير إشتكوا قوي من الموضوع ده


بصراحه مش عارف اقول ايه !!!


بس ياريت الي يعرف حل يقول يا جماعه


إحنا كلنا في مركب واحده


لو غرقت هنغرق كلنا


وإن عليت هتطفو بالجميع


وفي الاخر مش هقول غير يارب ارحمنا

هو احنا هنبقي مسروقين في كل حته كده


حتي في النت ؟؟


ربنا يهدي الجميع


وحسبنا الله ونعم الوكيل


................

صحيح : بمناسبه السرقه بقي كنت معدي اول امبارح
لقيت تجمع ناس مش بشوفه غير في الاعياد
مشيت ورا فضولي ورحت اتفرج ولقيت ناس ماسكين حرامي
وزانقينه والحرامي اتضرب ضربا مبرحا حتي انه يستغيث
المنيل طلع خطف شنطه من واحده وجري وإتمسك
وطبعا أكل علقه ما أكلهاش حمار في مطلع
ده غير الي هياخده من الشرطه
وسمعت اتنين بيتكلموا
بيقولوا لبعض
ده لسه من يومين واحد بموتوسيكل خطف شنطه واحده وجري
ومن موقعي هذا بحذر وبقول كل واحد ياخد باله من شنطته
لحسن فيه خطر علي الشنط
وإحنا مش مسئولين عن أي حد تضيع منه شنطته
رئيس جماعه مراجيح مولد النبي

.......................


بعيد عن البوست


منظر : تاكسي يمر في إحدي الشوارع المكتظه بالناس ويعلق بأعلاه بوق مناداه

ورجل يجلس في المقعد الخلفي للتاكسي ويمسك بــ" ميكروفون "

اعلان : بشري لأهالي اسيوط الكرام لقد وصل اليوم الرئيس الامريكي

( باراك اوباما ) قريب الحاج ( حسين أوباما ) وسيقوم بإلقاء خطابه الرسمي للعالم الاسلامي

وكان ( القرف ) قصدي الشرف لمصر كمنبرا للعالم العربي والاسلامي ( يا قلبي لاتحزن )

يسمع الجمهور ذلك الكلام فيقول أحدهم بكل برود : طيب وإحنا مالنا يعني ما ييجي ولا مايجيش مالناش فيه

يرد شخصا اخر يبدو عليه ( حيميشون ) وحار الدماء : وده جاي يعمل ايه ده هي ناقصه

يرد الثالث ضاحكا : وأتاريهم بينضفوا البلد ما انا قولت برضه ده مش بــ" عاده "

يرد اخر : عادي يعني وإيه الجديد ما قبله جه كام رئيس من كام دوله بس هو زي ما تقولوا يا جدعان

مصر عايزه تاخد الرضعه والرضا .. ديه بس بتقدم السبت . . تلاقيها عايزه حاجه

يرد رجلا مسنا : دلوقتي الي ناقص العرب يقولوا علينا خونه .. يعني وهو ايه الي هيجد

ماهم علطول بيقولوا عننا خونه من زمان .. يعني لو لمؤاخذه دخلنا الحمام ممكن يقولوا علينا خونه

( حيث أنه الحمام صناعه أمريكيه ) او ممكن قطع الغيار ( الشطاف وما أدراك ما الشطاف )


يلا حسبنا الله ونعم الوكيل


ويجتمعون في النهايه علي كلمه واحده : وإحنا مالنا إحنا ضيوف في البلد ديه


" دع الخلق للخالق .. يكش تولع "


(يلا يكش يتسرقوا الكلمتين دول بالمره ) :) :) :)


وإلي حلقه جديده من برنامجكم الاسبوعي ( علي الناصيه مع زيزو )




تمت

................................

تحديث : معلش تم حذف الرابط
لأني حطيته في لحظه عصبيه
وكده هساعد علي اشهاره
معلش علي كل الي نبهته يشوف اللينك
حسبنا الله ونعم الوكيل في كل من يسب رسولنا .. وفي كل من يسب ديننا .. وفي كل من يشكك بصحه قرأننا اللهم أرنا عجائب قدرتك شل ألسنتهم وإعمي أعين الكفار الفجار .. اللهم زيدهم جهلا وكفرا حتي يأكلهم الكفر وتأخذهم أخذه عزيز مقتدر اللهم زدهم حقدا علي قرأننا ودعهم يحاولون مغالطته كي يتطرقون من ضلال وضلال إلي الهدي فإن كنتم
تتهافتون في البحث عن خطأ واحدا في القرأن وهو إفتراء وجهل وإنعدام فهم
فإبحثوا في دينكم اولا وافهموه ثم إبحثوا في ديننا
فهو منتهي الحمق ان تبحث في الاديان الاخري
من دون أن تفهم دينك اولا
أملا في إخراج خطأ او ما شابه
ولإثبات صحه دينك الذي لا تعرف عنه الكثير
إذا كنتم لا تريدون الاسلام فإتركوه لنا ... لا نريد أقوالكم العفنه ولا نريد إجتهاداتكم الخرقاء عنوه في اخراج خطأ في القرأن
لعنه الله علي المنافقين
لكل من يشكك في الاسلام
وعذرا لمن فهم كلامي خطأ او حسبني اقصده