25‏/05‏/2008

لحظه من فضلك


أسئله لأختبار الذكاء :


حضر ورقه وقلم وأحسب معدل ذكائك...


1_بتقعد كام ساعه قدام الكمبيوتر والنت



2_بتقعد مع أصحاب كام ساعه


3_بتنام كام ساعه وبتاكل في كام ساعه


4_ بتتكلم بمعدل كام ساعه مع الناس .. وفي مقابلات .. وتليفونات ونت


5_ كام ساعه في اليوم فاضيه +معدل أوقات الفراغ


دلوقتى قلى اليوم 24 ساعه


نقول 8 ساعات نوم .. 8 ساعات شغل ومذاكره وشغل البيت



8 ساعات فيهم خروج وأكل وكلام وتسليه



فين العباده فى حياتك ؟؟؟


طيب تعالى كده نحسب وقت الصلاه


دقيقتين وضوء .... 3 دقايق تقف تصلي

ها خمس دقايق هتتعبك .. طيب هما خمس صلوات



لو حسبناهم هنقول وقت الصلاه فى اليوم كله نص ساعه


أو الادق نص ساعه الا خمس دقايق لو حسبناها بنفس المعدل


طيب نحسبها من ناحيه تانيه :


ربنا مديك حواسك .. وصحتك ( ده مش قر ده حسد بس )


وناس تحبك .. وبيبعد عنك الشر .. وبيرزقك بذريه صالحه

.. وبيرزقك بفلوس ورزق .. ومش بيخذلك


والاكل.. وراحه البال والستر


ونعم كتير قوي لو قعدنا نعد مش هتكفينا سنين فى عدها ..


السؤال دلوقتي : هتستخسر في ربنا نص ساعه من ال 24 ساعه ؟؟


طيب نقول فى زمنا مفيش حد بيعمل حاجه بدون مقابل


ربنا وحده الي مش مستنى منك مقابل


طيب مش المفروض نشكر أي حد عملنا خدمه


ما بالنا بربنا الي كل حاجه بقدرته ادهالنا


مش المفروض نشكره .. وشكر الله بالصلاه وأتباع فروضه


والابتعاد عن عصيانه


لما بنكون رايحين انترفيو او لقاء عمل أو هنقابل المدير


بصراحه بنستحمى ونلبس اشيك حاجه على الحبل


ونكويها والبرفانات تتوجد وتتحط


ونبقى على سنجه عشره وننزل نقابل المدير بكل احترام


ونبقى قلقانين ومتلخبطين وخايفين نقول حاجه تزعله


وكل ده عشان نفوز بالشغل .. والدنيا كلها زايله وفانيه


طيب مش عاوز تفوز بالجنه ..ديه أركان الاسلام


الشهادتين .. أقامه الصلاه .. أيتاء الزكاه .. صوم رمضان


حج البيت لمن استطاع اليه سبيلا


يعنى الصلاه الركن التانى من أركان الاسلام


وزى ما قولنا


دقيقتين وضوء + 3 دقايق صلاه


مفيهاش تعب ولا أي حاجه وبعدين نشوف


بنضيع كام خمس دقايق فى اليوم


لماذا تجعلون الله أهون الناظرين اليكم


دلوقتي مش مكسوف من نفسك


الفرصه قدامك وربنا غفور رحيم


يلا قوم اشكر الي مديك كل النعم الي في حياتك

اشكره عشان كمان تنول النعم ديه بعد مماتك

وتفوز بالجنه ..

لازم نكون مع ربنا في كل وقت .

مش في الشده نجرى ونصلى ..وفي اللين ننسي


ولكل الاديان كله يتقرب من ربه عشان ربه يرضى عنه


التقرب من الله أول طريق الصلاح والاصلاح


الصلاه تطهر الانفس والقلوب


ها قلى بقى بعد ده كله جبت كام في الاختبار
الهم صلي وسلم وبارك على سيدنا محمد وعلى اله وأصحابه أجمعين
ومن اتبعه الي يوم الدين

20‏/05‏/2008

ورده




ورده صغيره بتشم الهوا

بتلعب وتميل مع كل نسمه

وبتشرب وتحس قطرات الندي على خدودها

عبيرها وعطرها بتطير بيه في كل مكان

وبجذرها بتلف الأرض وتصبح وتمسى على جيرانها

ومره واحده تبدأ الورده تتأثر بالجو ال حواليها

وتبدأ تقفل ورقها .. وتحس أن قلبها بيدبل

انا الورده ديه .. حاسس بحاله بأحباط

حاسس أني عايز أنعزل عن الناس

حاسس بركود ومش عايز أكتب

مش قادر أعمل حاجه ....

ملل وخنقه وزهق ...

يا خوفي لأرجع أتقوقع على نفسي من تاني

لأن الحاله ديه بتطول معايا قوي

لأن أكتئابي وحش

حزن بيحاصرني مش عارف منين ولا منين

واليأس وأخواته عمال يتملك مني .. وتوابعه من الاحباط

ربنا ما يحكم على حد .. وربنا يقف معايا

وأطلع من الحاله ديه على خير

يارب يا ورده ترجعي تفتحي من تاني

ومتقفليش ورقك من تاني

وترجعي تلعبي مع قطرات الندي

وتصبحي وتمسي على أخواتك

15‏/05‏/2008

يرحم زمان .. وليالي زمان


زمان كنا بنسمع فيه حاجات كتير .. بنشتاقلها قوي


حاجات كتير مفتقدينها .. مستنينها


ربما تستخدم اله الزمن لتأتي لهذا الزمن...



يعني :


الكبير يعطف على الصغير .. الصغير يحترم الكبير


أي راجل كبير أبونا .. أي ست كبيره أمنا



نحترمهم نسلم عليهم ..بكل أدب


لو نصحونا أو شتمونا أو حتى عنفونا


نسمع ..ونحط وشنا في الارض.. ومنردش



الناس تساعد بعض..


الناس تحب بعض ...


الناس تخاف على بعض ....


مفيش خناق .. الكل يتسامح


( والكاظمين الغيظ والعافين عن الناس والله يحب المحسنين ) صدق لله العظيم


نبر والدينا .. نحسن اليهم ..منشتمهمش



منسبهمش.. ونسيئلهم.. ونلعنهم ..


نعاملهم معامله الاسلام..


وأن حتى أستحالت المعامله


نعاملهم في الله ...


قال تعالي (وقضى ربك ألا تعبدوا إلا إياه وبالوالدين إحسانا


إما يبلغن عندك الكبر أحدهما أو كلاهما فلا تقل لهما أف


ولا تنهرهما وقل لهما قولا كريما واخفض لهما جناح الذل من الرحمه


وقل ربي إرحمهما كما ربياني صغيرا) صدق الله العظيم


نتعاون مع بعض ..


كان فيه وعي .. تفاهم .. تقدير .. إحترام


الاب يفهم عياله .. ويفهمهم الغلط من الصح


الام تحاجي على عيالها وتاخدهم فى حضنها


الاب والام يزرعوا الحب في عيالهم

كل أخ يحب اخوه .. ويخاف من النسمه عليه ...


ساعه الفرح كله يفرح ويضحك ويزغرط

وقت الحزن .. كله يقف جنب بعض

يكونوا نسيج واحد


العلم كان شرف وثقافه ومستوي رفيع ..دلوقتى ياقلبي لاتحزن


المدرس كان بيتقدس ويتشبه في رسالته بالرسل


؛ قم للمعلم وفه التبجيلا .. كاد المعلم أن يكون رسولا ؛


الطلبه كانوا بيحبوا العلم .. بيحترموا المدرسين


وبيقدروهم .. وكانت العلاقه أب بأبنه مش مدرس وطالب


دلوقتى ...........


الاصحاب بمعني الكلمه .. الدمعه واحده


الضحكه بتخرج من بق واحد


في الشده راجل واحد ..


الجيران كانوا لبعضهم


أم محمد تعمل رز بلبن تبعت طبق لأم مصطفي


أم مصطفي ترجع الصينيه فيها بسبوسه ....


مصر وطن واحد .. نسيج واحد .. ولادها كلهم راجل واحد


كل واحد مقتنع بالى في أيده وبنصيبه ..


بقى كله بيحقد ويبص للي في أيد غيره ...


المحتاج بيلاقي أكل .. ويلاقي كسوه .



ويلاقي أوضه فوق سطوح ..


تحميه من سخونه الشمس في الصيف



وبطانيه صوف تحميه من برد الشتا


يلاقي أيد حنينه تطبطب عليه


وتقوله إنت مش لوحدك في الدنيا ...





بنات الحاره كلهم إخواتنا ..


الي يعاكسهم.. كأنه إتعدي على حرمه بيتنا


الأحترام اللبس الجميل



الطرحه والبرقع واليشمك



الشياكه في الجلابيه والمنشه والطربوش


الملايه اللاف و المنديل بقويه



الحنطور .. القهوه البلدي



الراديو شغال فيه عبد المطلب ومحمد قنديل



حتي في حرب 73 كان كله بيحارب


راجل وست .. ولد وبنت


شاب وعجوز .. مسلم ومسيحي



خطبه عبد الناصر





ياسلاااااااااااااااااام لو يرجع يوم من أيام زمان


أتمني نرجع أخلاق زمان


لكن عارف اني هسمع .. برضه كلمه من كلام زمان


للست أم كلثوم ..


( عايزنا نرجع زى زمان .. قول للزمان إرجع يا زمان)


ولا لعمنا ؛عبد المنعم مدبولي؛ الله يرحمه

يرحم زمان وليالى زمان..


الناس يا متهنى يا فرحان

الدنيا كانت ورده وشمعه

ولسه مخترعوش أحزان

زمان زمان وليالى زمان ..

بعيد عن الموضوع


حاسس إني عايز أبكي قوي

12‏/05‏/2008

مدونين في الهجايص



مواقع .. منتديات ..مدونات




كلها حاجات ليها فكر وبتهدف لتوصيل أفكار للناس




او بالأخص للشباب بما أنهم أكتر ناس بتدخل على




المواقع ديه بأختلاف تصنيفها




المفروض إنها بتهدف للتواصل بين الشباب




ومختلف الاجيال وكمان بتبقى فى موضوعات نقاشيه




أكتر من رائعه .. والمفروض يبقى فيه نقاش عقلانى




على الاقل تبادل ومشاركه أفكار الهدف منها الاصلاح




والنهوض بمجتمعنا للأفضل .. لأنه مش هينهض الا على أيدينا




(ده المفروض يعنى )




لكن ده مش بيحصل دايما




بيتحول الحوار الى شيء لا يرقي لمسمي حوار




ممكن يبقى بين أتنين فى قهوه ..




أو أتنين في شارع ...




مش تقليل من كلام الناس ديه ولا تريقه




لكن الكلام بينهم بيبقي من غير حواجز




يعنى كلام على هزار على شتيمه على كله




كوكتيل






في المواقع ديه على أي موضوع بمجرد الاختلاف




نلاقى هجوم وياريت كدة وبس . وشتيمه بأقذر الالفاظ




يعنى أكتر من شارع.. وناس تقول اى كلام وخلاص




المهم تشارك ...




ولأن في الفتره الاخيره لقيت ناس معلقين




وأصحاب مواقع بيتبادلوا الشتيمه كما لو كانت




شيء عادي ودول في نظرى مش مدونين اصلا




او وجهه نظرهم باهته وغير مسنده بدليل




لأن في مقوله بتقول ( علاء صوتك يدل على ضعف حجتك )




مابالنا بالي بيشتموا والأكاده انهم هما أصحاب المواقع ديه




حاجه تكسف بجد




طيب مش المفروض يبقى فيه نقاش بناء




على الاقل ممكن حد يستفاد او يقتنع لو قراه




بلاش كده




طيب مش مواقع الانترنت من بعض أهدافها التوعيه




لأنها بتعتبر عامل او وسيله من وسائل الاعلام




الي فرضها عصرنا




والاهم يكون فيها افاده للمتلقي




والا مش هيكون ليها فايده مش أكتر من




أهدار وتضييع للوقت ؟؟؟




نداء لكل مدون فى موقع .. في منتدي




في مدونه .. ولكل معلق




ياريت نلتزم بحوار عقلاني بناء




نجني من وراه أستفاده وتبادل خبرات وتجارب




والاهم منطلعش عن شعورنا لحظة الاختلاف




والمدونين مينشروش التعليقات والردود




الى مفيهاش أفاده أو مشاركه فكريه






أتمنى ساعه أختلاف الاراء




أننا نحترم الرأي الاخر




ومادام دخلنا في نقاش




نمتثل لقاعده




رأيي صواب يحتمل الخطأ




ورأيك خطأ يحتمل الصواب




يعنى نكون مستعدين يا نقنع




يا نقتنع




ولأصحاب المواقع




بدل ما نرد على الى بيشتموا بالسب




نوضحلهم وجهه نظرنا أكيد هيقتنع حتى ولو




بينه وبين نفسه




وميبقاش مجرد أسفاف ومهاترات




وسب وتبجح




أتمنى .. ولسه بتمني




09‏/05‏/2008

أنا بتعلم منك ..


لما تقف جنب حد فى المواقف الصعبه


لما تكون دايما بتتصدى لأى حد يضره


دايما بتمسح دمعته .. دايما بتواسيه


دايما بتسمع شكوته .. وتحل معاه مشاكله


بتضحك معاه .. وتحرقك دمعته وتبكى معاه


لما تحبه قوى .. وتحس انه بيحبك قوى

...


من طبعه تعرف انه ميعرفش الكره


قلبه أبيض .. طيبته مشفتهاش فى حد


صريح .. الى فى قلبه على لسانه


...



أول ما يتمرد


تكون أنت حقل تجاربه


أول واحد يتمرد عليك


ويجرب فيك


القسوه .. الجرح


الألم.. المرار .. التعب




...


ومن قربه من قلبك


ومن معزته عندك


ومن صله قرابته ليك


للأسف .. مش قادر تكرهه



...




يتعلم فيك الشر


ويجرب .. ويجرب


لحد الاحتراف


وأنت لا قادر تكرهه


ولا قادر تجرحه

...


لو منعت عن نفسي الظلم


وواجهت..هوجعه..

ولو قسيت قلبى .. وانا مقدرش


هيغضب عليا ربي


وبظلمه هردعه


...




أديت لنفسي فرصه


أسامحه .. أعاتبه


أسمعه..



وهو لا بيقدر .



ولا بيفكر..



لكن انا فى نظره



جاحد .. وظالم...



...



وصلنا لطريق مسدود

كل ما أجي أنسي

الاقى توب شره مفرود

وكل إسفين يحصل



ألاقي كفه فيه ممدود



. . .



والمصيبه أنه طيب قوي



والى مشى وراهم بيقسوا قلبه



وبيشنعوا عليا عنده

بيقسوه عليا ويبعدوا عنى حبه



وانا لا حول ولا قوه



لكن ربنا على الظالم القوي



. . .




نفسى اقوله طهر قلبك

سيب الشر الخير اهو جنبك


والرب بيغفر ما بالك العبد


الحق نفسك .. وأبدا فكر في الحل


العمر عمال يعد


. . . . . . .


مجرد حاله من صميم قلبى


بهديها لكل أنسان قريب منى جرحنى






03‏/05‏/2008

يوم ميلادي


اليوم أطوي ورقه جديده من عمري الافتراضي



أنه ليس يوما عاديا .. أنه ذكري يوم ميلادي


أتذكر كم تألمت.. وكم عانيت يا فؤادي



ملحمه ذكريات .. من أحمال السنين بالماضي


ايام الحلم بالبطوله .. التي غدت بالحزن لقهري وأستعبادي




فأنظر فى المرءاه .. فلا أعرف عمري ولا وجهى من الاحزان


فقد تكبلت بقيود.. في كل وقت وفي كل مكان




وكفرت عن ذنوبا لم أفعلها .. وإن حييت مثل عمري مرتان




فلا أعلم اليوم أطفيء الشموع فرحا



أم عدا لسنوات العذاب..




فهل يتمني الناس لي عمرا مديدا



أم حياه مليئه بالخراب..





فأي زمان أحياه .. من يفرق الاحباب



أم من يظلم بلا أسباب ..


فلا أعرف هل أكون سعيدا




أم أنكس عمري .. وأقيم الحداد..





ففي ذكري يوم ميلادي .. لن أحتفل




لكن سأدعي رب هذا الكون .



أن يزيل عني الشرور.. وفي حب الله وطاعته دوما سأكون



وأن تبقي ألسنة الناس بعيده عني



وأن ينسونى فيما يسرون وما يعلنون..



وأن أظل في طاعه الله



وأن يقبض روحي محتفظا بعقلي من الجنون..





فسأطفي الشموع



وسأمسح عن وجهي الدموع



وأتمنى لنفسي حياه هادئه



بعيده عن الصخب والألام



بعيده عن الجراح والاحزان



وسأبقي وأحيا كما أنا .



راضيا بحالي ..



رافعا شعاري ...



لأ للأستسلام....
3/5 عيد ميلادي
يارب عدي اليوم ده على خير


وكل سنه وكل الناس بصحه وبطاعه الله طيبين وبخير

01‏/05‏/2008

الشباب المصري يعمل إيه!!!



المشهد الاول


قاعد فى البيت مشاكل وقرف .. الأب والأم بيتخانقوا


صوت من بعيد .. أنت يا زفت أنزل هات الى قولتلك عليه



انت لسه مروحتش .. انت مواركش حاجه تعملها .. غور من وشى



وطبعا ده هيوصله لـ..




المشهد التانى





يلبس وينزل الجامعه.. محاضرات كتير


دكاتره تخنق .. قعدات نميمه .. أصحاب بتهييس


بنات لابسه من غير هدوم...


كل ولد وبنت واقفيين بيحبوا فى بعض بالساعات


طبعا أكتئب !!!



المشهد التالت




يرجع البيت يفتح التلفزيون .. برامج أخباريه




ومسئولين بيجملوا الكدب .. غلا أسعار



فرص شغل وهميه .. ناس مطحونه وناس معدمين..


مرضى وحالات صعبه



وطبعا أكتئب!!!




المشهد الرابع



يدخل يذاكر .. الكتب شكلها يسد النفس .. مقرر كبير


دكتور عامل فصل من الاستظراف والرغي .. وفصل فذلكه


وفصل من أستعراض لثقافته المنقوله من المراجع


لا بصراحه بيتعب ...


ولو طلعت الى مالوش لازمه من المنهج


مش هتطلع غير بفصلين تلاته !


ومنهج تفصيلي في كيفيه تعقيد الطالب ..



وكالعاده أكتئب


وساب المذاكره ونزل



المشهد الخامس



ينزل الشارع يلاقي أتنين بيتخانقوا فى الإشاره

وناس بتناكف مع البياعين.. ومواصلات زحمه

قابل أصحابه على القهوه ..

ناس مترصصه



منهم الى متنحين فى هيفا وهي بتبوس الواوا

ومنهم الى بيلعب دومنه وطاوله

ومنهم الى قاعد كفران وبيسب للبلد والى فيها !

بيتكلم هو وأصحابه في موضوعات كتير من

تعذيب في السجون ومعتقلات.. قانون طواريء وأرهاب..

وبين حال الدول العربيه .. شهدا وقتلي وجرحى وأسري

عمليات أستشهاديه وأنتحاريه فلسطينيه وعراقيه..

وبين رسوم مسيئه للرسول ( صلى الله عليه وسلم )

من فئه جاهله ..وعالم فاضيه وحقيره

وبين غلا أسعار وظلم .. وأستعمار للأفكار

وأنعدام ديموقراطيه وحريه سياسيه

وأنعدام حريه الرأي ياااااااااااااااااااااااااااااه !!!!


بيوصلوا لذروه الاكتئاب وبيقوموا يروحوا ليفرقعوا ..



المشهد السادس والاخير

يقعد على النت شويه يمكن يسمعله أغنيه

ولا يقرا خبر يفرحه ..

يلاقي ناس بتشتغل بعض فى شات !!

منتدي ولا مدونه مستفزة منزله موضوع مستفز

بين تأييد ظلم الحكومه ..

وتأييد سب الرسول

وسلبيه ورضي بالاحوال السيئه

كده شويه وهيموت من الاكتئاب !!!!

ويبقى مش عارف يلاقيها منين ولا منين ؟؟؟


ولا عارف يعمل أيه !؟!

مبقاش قدامه غير 3 حلول ::


يا يلحق قطر التهييس وينفض ..

يا ينتحر ...

يا إما ينام ...

بس إفرض نام وحلم بكوابــــ.....


تـــمــت

::ديه مجرد حاله مصريه حتى النخاع::