21‏/03‏/2009

أخر كلام ( سنه )







أمبارح كان يوم ..لكن عندي مكانش زي أي يوم


لأن أمبارح مدونتي العزيزه بقي عندها سنه


انا مبسوط جدا إني ليا سنه بدون


علي العموم انا مش هطول


أتمني إن حصادي في السنه ديه كان كويس


ويارب السنه ديه أكتسب اصدقاء اكتر ويتطور اسلوبي وفكري


ومقالاتي أكتر .. وأكون عن حسن ظن كل واحد أحسن الظن فيا


ودلوقتي وإحنا بنحتفل إسمحولي أهديلكم القصيده ديه



ديه تجربه شعريه بيني وبين الاخت والصديقه العزيزه Black angel


أحنا كان نفسنا في تجربه زي ديه ..وفي الاول والاخر هي أخت جميله وصديقه أجمل


واسيبكم مع القصيده :



أخر كلام


زيزو و black angel


...



اللي بينا مش بعد الغرام ولا بعد الفراق
بعد السنين العتاب صحي والحنين في القلب فاق
_عاوز إيه ؟ورجعت ليه ؟
أنا كنت ناسيه وسكت قلبي وقلت البُعد هقدر عليه
دلوقتي بس فهمني


من كام سنه


كان وجودي بالنسبالك إيه ؟

انتي بالنسبالي كنتي ترانزيت
بتكتبي بإيديكي همي وتمحي الحرية والشخابيط


يعني انتي كنتي وقتها محطه
بنسى بيها أيام الماضي والتخبيط


يمكن كنتي في حياتي نجاح ويمكن كنتي سقطه
وانا عندك ايه أكون؟؟
بقيت جواكي عاشق
وفي عيون الناس مجنون


جاوبيني وقولي : انا عايش الحقيقه ولا موهوم


ودلوقتي إتكلمي بصدق وصراحه


انتي عايزه الغرام ولا حابه الفراق


القلب لسه موجوع ولا نساه الاشتياق



يعني اقول علي حبي لعنه في قلبك


ولا سواد من القلب زال



_ يعني شكرا على كل حال
بُعدنا مبقاش محال
والفراق جنة ف بعادك
أجمل من أحلامي والخيال
تقدر تسيب قلبي وتروح
وياريت كمان تاخد معاك
كل الآلام .. كل الجروح
وإذا كنت أنا محطة ف حياتك
برضه سايبه بصمه ف ذكرياتك
ولو حاولت تداري عني
ازاي هتهرب من حقيقة ف مرياتك ؟



صدقيني معدش فيه هروب
انا من بعد فراقك بقيت علي أمري مغلوب
ولو بصيت في المرايه هشوف صورتي فيكي
هتقولك ارجعي اسمعي الي محبش قبلك
ولا عرف يحب بعديكي
ومهما فكرتي اوحاولتي تنسيني
انا برضه كنت أكبر علامه في دنيتك
وبقدر احرك مشاعرك
وياما رسمت دموعك وبسمتك
تفتكري بعد ما كنت بدايتك
اقدر اكون أخرتك؟؟
احنا خلاص مبقيناش لبعض
كل واحد فينا عاش حياته لوحده طول وعرض
تقدري تقولي حبينا ننسي
الزمن الي غدر بينا لازم كنا عليه نقسي
ونوينا من جوانا نكون جداد
نكون مع بعض اصحاب وننسي إننا احباب
ابقي في الدنيا ظهرك
وعمرك معايه ما هتحسي بقهرك
وانتي معايه هتكوني امي
نصاحيك غاليه وكأنك من عيلتي و دمي
وارجع واقولك عندك حق
البعاد كون ما بينا شق
وساعات البعد بيكون مفيد
بيداوي القلوب والنفوس تطيب
يمكن قدرنا كان أقوي منا
خلاص سوا ملناش نصيب



_ انت خايف م القرار
من فراق شمسي لحياتك والنهار
وانا كمان بخاف عليك
عشان دموعك غاليه عندي
وقلبي كان طول عمره ليك
وقراري هوا :
أنا مش هفارق
هفضل معاك
وحيات هواك
لـَنكمل أنا وأنت المشوار
وكفايه انك رجعت ليا
وبعتابك عرفت اني
لسه برضه عايشه فيك
واللي بينا مش كلام
أو شوية مشاعر ضايعه او حطام
اللي بينا كان سنين واحلام كتير
اترسمت سنين قدام
نقدر نعيد كل اللي كان
نقدر نصحي فوق جبين الشوق غرام
تعالى ننسى أي جرح
و كل أحزاننا والملام
ونفتكر أيام ما كنا
بنحلم بالسعادة وكل فرح


بعتابنا ده عدينا قسوه
ونسينا كل أهه مره
ومش ممكن هننسى تاني
مهما يحصل بينا بكره



اسمع يا زمن صوت الحق
القلب من كتر العتاب رق
كان لازم نحلم سوا
ونعلم الناس الهوا
والحب من تاني يرجع يتولد
ده العمر خلاص مبقاش فيه عشان يتسرق


.........


طبعا انا كنت مبسوط جدا


و التجربه دي استفدت منها جدا


وبشكر اختي وصديقتي العزيزه /black angel


إنها أتاحتلي الفرصه ديه


ويارب كل سنه نتقابل زي اليوم ده


ونحتفل بيه سوا


كل سنه وانتي طيبه يا أمي


كل سنه وانتي طيبه يا مدونتي


رجاء : بتمني من كل واحد دخل المدونه إنه يدعي لوالدي لإنه مريض قوي

ربنا يعفي عنه ويشفيه ويرحمه ويغفرله وكل المسلمين