23‏/02‏/2009

يا ناس كفايه.. بجد كفايه

....................
السلام عليكم ورحمه الله وبركاته

موضوعنا النهارده بيدور في حلقه مفرغه وواسعه في نفس الوقت :



بيت واحد فيه أخ مش بيحبش اخوه . وزوج مش بيحب زوجته

جيران في بيت واحد وشارع واحد مش بيحبوا بعض وعلطول خناقات

عيلتين بينهم خلافات ومشاكل وبرضه بيكرهوا بعض

المنطقه الفلانيه بتكره المنطقه التانيه وبيقولوا علي بعض كذا .. كذا ..الخ

المركز الفلاني بيكره المركز الفلاني في نفس المحافظه

المحافظه الفلانيه بتكره المحافظه التانيه وبتقول علي أهلها دول مش رجاله و..و..و .. الخ

الدوله ديه بتكره الدوله ديه وبينهم مشاكل ونزاعات طويله متوارثه ومتداومه

وهكذا .. وهكذا ..وهكذا


طيب انا كل ده عايز اقول إيه ؟؟؟

انا عايز اقول مش مصر بس الي بتفكر كده العالم كله .. نحلل واحده واحده :

لما أخ مش بيحب اخوه وبيحصل لأسباب كتير بدون ذكر وإن موصلش لدرجه الكره بيبقي نفور وخلاف وخصام


ولما الجيران بتكره بعض .. العائلات .. المناطق .. المراكز .. المحافظات .. الدول

طيب هوضح أكتر : لما ناس تكره بعض في بيت واحد ده يبقي ايه إزاي هيقدروا يعيشوا مع بعض ؟؟

ونفسي افهم ليه بيقوم نزاع بين مناطق وبعضها ومراكز في محافظات واحده

وأكتر من محافظه وسياسه البقاء للأقوي .. ولما يتطور النزاع بين مصر والدول العربيه ..

الدول العربيه وبعضها .. العالم كله وبعضه ...

يبقي أولا : إزاي بنسئل ليه العرب بيكرهونا .. طيب ليه بيكرهوا بعض .. طيب ليه إحنا بنكرهم ..

ليه الغرب بيكرهنا .. والدول الغربيه بتكره بعضها ؟؟؟؟

طيب هل مثلا في ظل كل ده مطلوب مننا إننا نتحد أو نجتمع علي كلمه واحده ؟؟؟

طيب هل وارد إننا نتظاهر بالاتفاق مره ؟؟

طيب هننتظر إيه من الدول الغربيه .. هنقول إحنا رخاص عندهم ليه ؟؟

طيب ما نسئل نفسنا إحنا ليه رخاص عند بعض .. وليه بنكره وبنسب بعض ؟؟


وليه لما واحد فينا بيقع تحت ضرس التاني مابيرحموش ( انا مش بتكلم عن جنسيات )


وللأسف أكبر مثال علي كده : إجتماعات جامعه الدول العربيه قمه في المسخره


وكأنه مسلسل أقل من كوميدي مثير للشفقه السخريه


طيب ده حلو هل ديه مناظر وسلوكيات حضاريه .. طيب هل في ظل ده كله هنوصل لحل ؟؟؟


أقربها لما تلاقي إنسان واقف وبيضرب جاره ولا اخوه بمطوه مش هقول فين القرابه ولا الجيره


هقول فين الرحمه .. فين الانسانيه !!!

أما تلاقي واحد مصري طالع في جرنال ولا في التلفزيون ولا في موقع بيشتم في المصريين


أو بيحقر من الانسان المصري ديه حاجه كويسه او هو محترم !!!!


ممكن حد يقولي هنكدب علي نفسنا ؟؟؟


هقوله مش عايزين كدب ولا نفاق ولا زيف إحنا عايزين يا تقول كلمه كويسه يا تقترح حلول بنائه قابله للتنفيذ


منجزه لا تعارض دين او عرف او حقوق شخص او شيء او قانون .. مش تطلع تفضل تتفلسف

وطبعا بتشتم من حرقتك كمبرر للي بيحصل .. وياريتك حليت


يا إما تقول من غير تجريح .. يا إما تسكت .. في حديث بيقول في ما معناه ( فليقل خيرا أو ليصمت )


إزاي أتجبر علي اخويا في الانسانيه ؟؟؟


إزاي ممكن أتمني الموت لشخص والهلاك لإنسان وفي المقابل أبني حياتي علي موته ؟؟؟


إزاي أتمني لشخص شيء يضره أو أسلبه حياته وحريته وإنت متخيلتش لحظه ده لنفسك ؟؟؟



طيب ده مش ظلم ؟؟ ده مش فساد وكره .. ده مش قله خير ؟؟


لما طفل يكبر ويضرب أبوه .. هل يضمن الابن ده لو خلف مش هتتردله .. هل يفتكر إن ربنا غافل ؟؟

أي شخص بيتمني لغيره الشر أي كان سلوك الغير ولو كان قاتل بلد كامله يبقي إنسان مشوه وكله غل

ومنزوع الإنسانيه ومايملكش عقل يفكر في أبعاد ظروف واقعه من أي نوع ...يبقي جاهل

يبقي يسكت ويخرس ...


مش من حق حد يدين حد .. أو يأذي حد .. أو يتمني لحد الموت أو يسلبه حياته او حريته او يتمناله الضرر

ده ربنا غفور رحيم .. وسبحانه وتعالي رب .. إنت يا إنسان يا شويه تراب تنصب نفسك إله علي الناس

وتأذي ده وتكره ده وتدين ده .. وتحكم علي ده !!!!

طيب هل نتخيل إننا نطالب بحقوق الانسان .. طيب مش نعرف الاول هو فين الانسان ؟؟ بيتكون من إيه الانسان

من قلب متحجر .. ومشاعر أبادها الجمود والتصلب .. وعقل أحمق أفضل من أجله أن يفكر في أن لا يفكر !!!

الناس فعلا إتنزعت من قلوبهم الرحمه ..

إنت مصري او عربي أو أجنبي أو تندرج تحت اي جنسيه أو جنس او عرق أو دين بتنقد مجتمعك؟؟

ده سليم وشيء عظيم طيب ما تحاسب نفسك الاول قبل ما تحاسب الناس وتسبهم وتكرههم


شوف إنت بتكرهم ليه ..

ولو إنت شخص صحيح بتفكر .. مش تحل مشاكلك الشخصيه .وبعدها تدور علي الاصلاح العام ؟؟؟

ولوكانت المشاكل الشخصيه مرتبطه وهتقل لو إتحلت المشكله العامه ...

طيب مش تحط حلول موضوعيه .. بدل السب والسخريه في بلدك وولادها ؟؟؟

طيب السؤال دلوقتي :

هل إحنا نستحق الحياه ... هل نستحق لقب بشر أو إنسان ؟؟؟


للأسف إحنا زي ما قال عادل إمام " نحن في زمن المسخ " ( العالم كافه طبعا مش دوله بعينها )


وفي النهايه منلومش غير نفسنا لما نتشتم من الغير ..

لما ولادنا وولاد بلدنا بيشتمونا هننتظر ايه من الغريب ؟؟


بدل ما نغير مجتمعنا فعلا ونفكر بعقول ناضجه .. لا بنختلف ونختلق حلول ساذجه ..

والاهم : ناخد صفه الألوهيه نحيي ناس ونموت ناس وندين ناس ونحاسب ناس .. ونقرر مصير ناس ..

ونسلب الحياه والحريه من ناس

ونحلل ونحرم. ونفتي مفيش مانع


للأسف كل واحد فينا نصب نفسه إله علي الارض يملك كل الصلاحيات الي تأهله يمرمط البني أدم


الي رب العالمين كرمه ...
البلد ديه وغيرها محتاجين عقول بجد .. شباب تبني الصح وللغلط تهد .. كلام يقوي وللسمو والعزيمه يشد


لكن للأسف مش هنقدر نعمل كده عشان إحنا للأسف ... ألهه


يا ناس كفايه بجد كفايه ...تعبنا شعارات وكلام علي الفاضي .. وكلام هو الفاضي نفسه


بس الي عايز اقوله في النهايه إن كل شخص مش بيفكر في أخوه المسلم .. وأخوه المصري .. وأخوه العربي


وأخوه الدولي .. وأخوه العالمي .. وأخوه في الانسانيه ربنا هيحاسبه علي أي ضرر يسببه


لأن ربنا وحده الي قادر يدين ...وبقدرته يقدر يعفي ويسامح ويغفر ويرحم

وفي النهايه أحب اختم كلامي بخير الكلام :

قول الله تعالي " وما ربك بغافل عما يعملون "



صدق الله العظيم

..................

تمت
تنويه: انا سعيد جدا بالافراج عن أيمن نور
ونفسي أقوله : ده قدر الشرفاء

11‏/02‏/2009

:: كلــــمه شكــــر ::



كلمه شكر نفسي أقولها للي يستحقها


بشكر كل عامل نظافه :


الي بيضحي علشانا الي احسن من الناس كلها
الي شغله أسمي وأعلي وأفيد من أي حد .. الي من غيره ما نسواش


بشكر كل سباك وكل كناس وكل بناء وكل نجار :


الي من غير شغلهم برضه ولا نسوا .. وبلدنا تتحول لمنبع للعفن والامراض


كلمه شكر لكل صاحب حرفه :


بيفيدنا وبيخدمنا وكلنا بنكنلهم كل الاحترام والتقدير والعرفان بالجميل
وياريت الناس بتعامل الناس ديه علي قد ما تستحق
بل بيعاملوها كما لو كانوا عبيد عندهم .. أو إنهم عالم حقيره
أقل منهم وعمرهم مايتساووا بيهم ....


مع إن الناس ديه أنظف من كل الناس وأحترامنا ليهم شيء واجب
والاهم إن الناس ديه قبلت بالشغل ده في حين ناس كتير غيرهم
شافت فيه مهانه
وتقليل منهم ...


والاروع بجد إنهم قدامهم طريق من أسهل الطرق الي بيه يغتنوا
ومفيش أسهل من الحرام .. وهما بيتبهدلوا ويتمرمطوا ويتذلوا من حد
مايسواش


علشان لقمه العيش الي بالحلال ....


انا عندي الناس ديه أشرف من الوزراء .. علي الاقل هما بيتعبوا علشان الحلال
وعمرهم ما كانوا حراميه ..


والشي العظيم إنهم شرفاء .. وشرفهم هو ثروتهم وهو ميراثهم
مع إن كلمه شكر قليله قوي عشان توفيهم
حقهم

بجد تحيه من قلبي ليهم ...

..وكلمه شكر ...

06‏/02‏/2009

عوده

السلام عليكم ورحمه الله وبركاته
وحشتوني جدا
يارب اكون انا كمان وحشتكم
إن شاء الله نبدأ من تاني
بس يارب ابقي ضيف خفيف علي قلوبكم
ومبروك رجوع أخويا العزيز / أدم الدرعمي
وبتمناله التوفيق وميرجعش يسيبنا تاني
تحياتي للجميع