المشهد الاول
قاعد فى البيت مشاكل وقرف .. الأب والأم بيتخانقوا
صوت من بعيد .. أنت يا زفت أنزل هات الى قولتلك عليه
انت لسه مروحتش .. انت مواركش حاجه تعملها .. غور من وشى
وطبعا ده هيوصله لـ..
المشهد التانى
يلبس وينزل الجامعه.. محاضرات كتير
دكاتره تخنق .. قعدات نميمه .. أصحاب بتهييس
بنات لابسه من غير هدوم...
كل ولد وبنت واقفيين بيحبوا فى بعض بالساعات
طبعا أكتئب !!!
المشهد التالت
يرجع البيت يفتح التلفزيون .. برامج أخباريه
ومسئولين بيجملوا الكدب .. غلا أسعار
فرص شغل وهميه .. ناس مطحونه وناس معدمين..
مرضى وحالات صعبه
وطبعا أكتئب!!!
المشهد الرابع
يدخل يذاكر .. الكتب شكلها يسد النفس .. مقرر كبير
دكتور عامل فصل من الاستظراف والرغي .. وفصل فذلكه
وفصل من أستعراض لثقافته المنقوله من المراجع
لا بصراحه بيتعب ...
ولو طلعت الى مالوش لازمه من المنهج
مش هتطلع غير بفصلين تلاته !
ومنهج تفصيلي في كيفيه تعقيد الطالب ..
وكالعاده أكتئب
وساب المذاكره ونزل
المشهد الخامس
ينزل الشارع يلاقي أتنين بيتخانقوا فى الإشاره
وناس بتناكف مع البياعين.. ومواصلات زحمه
قابل أصحابه على القهوه ..
ناس مترصصه
منهم الى متنحين فى هيفا وهي بتبوس الواوا
ومنهم الى بيلعب دومنه وطاوله
ومنهم الى قاعد كفران وبيسب للبلد والى فيها !
بيتكلم هو وأصحابه في موضوعات كتير من
تعذيب في السجون ومعتقلات.. قانون طواريء وأرهاب..
وبين حال الدول العربيه .. شهدا وقتلي وجرحى وأسري
عمليات أستشهاديه وأنتحاريه فلسطينيه وعراقيه..
وبين رسوم مسيئه للرسول ( صلى الله عليه وسلم )
من فئه جاهله ..وعالم فاضيه وحقيره
وبين غلا أسعار وظلم .. وأستعمار للأفكار
وأنعدام ديموقراطيه وحريه سياسيه
وأنعدام حريه الرأي ياااااااااااااااااااااااااااااه !!!!
بيوصلوا لذروه الاكتئاب وبيقوموا يروحوا ليفرقعوا ..
المشهد السادس والاخير
يقعد على النت شويه يمكن يسمعله أغنيه
ولا يقرا خبر يفرحه ..
يلاقي ناس بتشتغل بعض فى شات !!
منتدي ولا مدونه مستفزة منزله موضوع مستفز
بين تأييد ظلم الحكومه ..
وتأييد سب الرسول
وسلبيه ورضي بالاحوال السيئه
كده شويه وهيموت من الاكتئاب !!!!
ويبقى مش عارف يلاقيها منين ولا منين ؟؟؟
ولا عارف يعمل أيه !؟!
مبقاش قدامه غير 3 حلول ::
يا يلحق قطر التهييس وينفض ..
يا ينتحر ...
يا إما ينام ...
بس إفرض نام وحلم بكوابــــ.....
تـــمــت
::ديه مجرد حاله مصريه حتى النخاع::
هناك 7 تعليقات:
مش معقول انت اكتر من ممتاز
قدرت تلخص وتوضح حياة الشباب فى 6 مشاهد سريعة ومؤثرة وبليغة
صدقنى انت ممكن تكون مؤلف ممتاز او سيناريست رائع جرب وربنا يوفقك
اما بالنسبة لادراج اسم مدونتى فى هامش مدونتك فده فخر ليا اعتز بيه
اتفضل اعمل اللى انت عايزه
وياترى اجابتى على سؤالك كانت كافية ووافية ولا لاء
ماتترددش لو عايز تتكلم معايا فى اى حاجة ابعت لى ميل
وانا حاكون سعيد بالرد عليه
شكرا زيزووووووو
صديقى الجديد
ايه يا عم الايام السود اللى احنا عايشينها دى
اقولك ...نفض
أهم حاجه ان الموضوع عجبك يا عم بيدو وانا بكتب فعلا لكن مش اكتر من اشعار وقصص قصيره لسه مفيش جراءه لكتابه سيناريو بس هحاول ان شاء الله وطبعا انا ضيفت مدونتك ونورتنى
وانت نورتنى
شكرا لتعليقك يا كريم ومنور انت وعم بيدو
منور يا أنسان
والايام بيضا ان شاء الله
ولازم ننفض عشان نعيش بلا أمراض عضويه او نفسيه
اتمنى متكونش اخر مره تنورنى
إن الله مع الصابرين يا زيزو..
بس بجد حلوه أوي وأحلى حاجه أنها من أحساسك الشخصي بالواقع اللي أحنا فيه
تحياتي :
BLACK
إرسال تعليق