( انا والتلفزيون) عمار يا مصر

السلام عليكم ورحمه الله وبركاته

ازيكم جميعا وحشتوني

طبعا ديه عوده بعد فتره إنقطاع نظرا لظروف مرض والدي ووفاته

وانا من ساعتها فاقد كل شيء ..

فاقد احساسي بالزمن والوقت

بقيت بنسي كتير او بالاحري مش بفتكر حاجه

حاسس إني حتي لو ضحكت مش بضحك بنفس

كمان تعبان علطول ومرهق

وماليش نفس وولا عايز وولا عارف اعمل اي حاجه

ده غير احساسي باليأس الرهيب والحزن المستمر

والاهم إكتئاب وكمان إحساس بالفشل

حاسس إن حتي الحاجات الي بحبها انا فاشل فيها

يعني مسيطر عليا قوي اليومين دول إحساس

إني مش بعرف أكتب ده من الجانب الادبي

ولا حتي عارف ادون حتي

وكمان لدرجه اني بفكر اني ابطل كتابه اصلا

واسيب التدوين

ده بجانب إن ليا هوايات تاني فيه الي مش بمارسها

وفيه الي ناسيها ..

ليا كام يوم مش عارف اختار بوست اكتبه

مش عارف انزل قصيده ليا ولا لغيري

ولا قصه ولا موضوع عام ولا عني ولا اي حاجه

وبيجيلي الحل سريعا بلاقي النت فصل

برتاح ..

طبعا انتوا قرفتوا وزهقتوا ايه الممل ده

وإحنا مالنا طيب بيه ما يتحرق

هقول اصبروا انا جايلكم في الكلام

في غمره الحاله الي انا فيها ديه

شويه حوادث حصلت في اليومين الي فاتوا كملوا عليا

اولهم الراجل الي جابه محمود سعد في البيت بيتك

الي قتل او ذبح عياله الاتنين من الفقر تقريبا او حاجه زي كده

وطبعا برود تام علي وش الراجل ولا كإنه دبح فرخه

وقال إيه بيطلب من القاضي يعدمه بأقصي سرعه

طيب انا نفسي افهم طيب انت مكتئب ما تتنيل تنتحر انت مال العيال

وكان تقريبا قعيد يعني علي كرسي بعجل طيب مش يمكن العيال ديه

تكبر وتبقي سندك في الحياه والاسم قال مهندس

بس السؤال الي هنا وفعلا جه في دماغ ناس كتير

طيب حتي بعد ما قتلهم وهو عايز يتعدم بسرعه قوي كده

ماقتلش ليه نفسه بالمره ؟؟

الي بعده ..

النهارده فتحت التلفزيون بالصدفه قولت اشوف الدنيا اخبارها ايه

اصلي بقالي كتير مطلعتش من الكهف

ألاقي زي ما بيقولوا " اول الغيث قطره "

انفجار سياره بجوار كنيسه العذراء الارثوذوكسيه في الزيتون

بتاعه محامي مسيحي لا وايه مش قنبله

ديه عبوه ناسفه يدويه الصنع والله حسيت إننا في العراق

بس تقريبا مفيش إصابات

الي بعده

في العمرانيه واحد شغال عند ستورجي

المهم إختلف مع معاه علي إنه يزوده فلوس

يعني زي مثلا لو كان بيقبض 35 جنيه وهو طلب يبقي 45 او 50جنيه الراجل مرضيش

المهم اخينا ده تقريبا من سوهاج سافر كام يوم لبلده وهو عاقد العزم وعنده النيه في الانتقام من الراجل

اول ما رجع إنتهز فرصه إن الام في شغلها تقريبا وراح البيت عند الطفلين

زياد "11 سنة" وشهد "6 سنوات وهو طبعا عارف إنهم لوحدهم اول ما الطفل زياد فتح الباب

طعنه اكتر من عشرين طعنه وطبعا بعدها مسك البنت وطعنها كتير قوي وهرب علي سوهاج

سمعت كمان إن عدد الطعنات وصل 42 طعنه شوفتوا الهنا والرحمه !!

المثير في الموضوع إن القاتل يبقي ابن اخت ابو الطفلين يعني خاله !!!!

لينك الخبر

الي بعده

لو مراتك عكرت مزاجك ممكن تعمل ايه ؟؟

ترنها علقه متنساهاش وتطلع غلك فيها

تطردها بره البيت او توديها بيت ابوها

تطلقها وترتاح منها تغور بقي

طيب لو مراتك سابت البيت من غيظك هتعمل ايه ؟؟

هتطلقها غيابي

هتطلبها في بيت طاعه

هتتهمها بسرقه حاجه عشان تجبر علي الرجوع

ايه كمان .. ايه كمان ..

الحلول كتير لكن بطل القصه ديه عمل ايه

أخد بنتينه هدية‏6‏ سنوات‏,‏ وحنان‏5‏ سنوات‏

شوفوا الفن بقي وراح لبير جوفي تقريبا او بير والسلام

ورمي البنتين وردم عليهم بالرمل ؟؟

وأد ده ولا إيه ؟؟ ورمل ؟؟ إيه ياعم الي انت بتقوله ده

أه والله يا جدعان هو ده الي سمعته بالنص

لينك الحادثه ما شاء الله لينك كله حوادث

الي بعده

بس مش فاكر الخبر بالظبط

واحد باين عايز ينتقم من مراته تقريبا كده يعني

قوم إيه يسافر من سوهاج للقاهره ب(ألي ) ويفرغه فيها هيا وعيلتها

ماهو تقريبا كده عياله معاهم

اصلي مش متأكد اصلي كنت اساسا باكل قمت من الاكل

ونزلت اصلا كنت هفرقع بصراحه وهبكي في نفس الوقت

يخرب بيت كده إيه البشاعه والساديه الي بقت في الناس ديه

إيه الغليان والانتقام الي بقي في الناس والرحمه الي سافرت من زمان ديه

الي بعده

اه لسه فيه بعده بس مش قتل خالص

كنت رايح درس لقيت عند المعيد حد من بتوع الضرايب

اسمعوا الكلام الي سمعته خليها تكمل بقي إن شاء الله ما حد حوش :)

قانون الضرايب العقاريه الجديد بيقول ايه :

كل شقه بتزيد مساحتها تقريبا عن 195 متر عليها ضريبه

بيعملوا ايه بقي شوفوا النصاحه والفصاحه

بيضربوا مساحه الشقه في سعر الارض

لو طلعت تعادل او تزيد عن نص مليون جنيه

يبقي تقريبا هياخدوا 5% من التمن

طيب نعمل مثال بسيط كده

لو شقه مساحتها 250 متر وسعر الارض 2000 جنيه مثلا يعني

يبقي 250×2000=500000 يعني نص مليون جنيه

يعني تقريبا حوالي 25 الف في السنه او شيء يشبه كده يمكن انا سمعت غلط

بس حاولت افهم اكتر من المعيد قالي نفس الكلام الي سمعته

وتقريبا بيفضل يدفع لمده خمس سنين وبعد الخمس سنين

بيتم تشكيل لجنه خماسيه لتقدير سعر الارض او الشقه او العقار

بعد المده ديه وتتحدد الضريبه الجديده

وهكذا وده طبعا علي الشقق والفيلل والعمارات والجراجات وكل شيء

والله حسيت اني قاعد قدام كتاب تاريخ وعيني جت علي موضوع

الاقطاعيين إن من كتر الضريبه الي كانت علي الارض

الفلاح مكانش بيقدر يزرع الارض ومش بيقدر يطلع منها التكلفه

وبيتحول لعامل في الارض بعد ما كان مالك

والله فعلا المعيد قالي ده الواحد يبيعها احسن

قال وإيه كل واحد ليه حق النقض في قيمه الضريبه ديه

زي تسويه ولا معرفش ايه

وكمان نسيت اقول النقطه ديه

إن الضريبه كمان علي كل الشقق او العمارات الي مش مسكونه

يعني انت لو مالك شقه ومش مأجرها يعني مفيش وجه إستفاده منها

برضه هتتاخد منك ضريبه

لا وحاجه مهمه الضمير الانساني والصحفي بيحتم عليا اقولها

كل المباني الي قبل 1995 خارجه من نطاق الضريبه

وياريت لو انا فهمي غلط يفهمني عشان هطق اساسا

لينك القانون

الي بعده

هو بقي فيه بعده ما خلاص

انا عارف اتسدت نفسكم علي الاخر

وإتخنقتوا مني وهتسبولي بس ده الي حصل

بس هي اصلا مراره واحده وانا شاكك في سلامتها جوايا

انا ايه الي خلاني افتح التلفزيون

تحديث : عملت التحديث بس عشان اقول إن عيد ميلادي كان يوم 3/5

قولت اهي اي حاجه تكسر النكد ده