واجب : البقاء لله إنتقل اليوم إالي رحمه الله
نجل السيد / علاء محمد حسني مبارك
وحفيد السيد الرئيس / محمد حسني مبارك
اتقدم بخالص العزاء لأسره الطفل الفقيد
وأن يلهم الاسره العظه والصبر والسلوان
......................
كل ما تقف مع واحد او تتكلم مع واحد تلاقيه يقولك
يا جدع الدنيا اتغيرت الناس معادتش زي زمان
وكل الناس تقول كده .. والناس الي قبلنا قالوا كده
والي كانوا قبلهم قالوا كده .. طيب يا تري هو فين الزمن الي كان كويس
وفين الناس الكويسين الي كانوا موجودين وبيضربوا بيهم المثل
كنت مندمج في روايه للدكتور " أحمد خالد توفيق " الي طبعا بعشق كتاباته
الروايه من سلسله ( ما وراء الطبيعه ) فكان في فقره في الروايه
بيقول فيها :
" كانت ( عفاف ) زوجه ( بكر ) نموذجا فريدا من نوعه
المرأه التي تشعر طيله الوقت بأن هناك خدعه ما
الاخرون يحاولون خداعها ...
كل الباعه لصوص ..وكل طارقي الباب نصابون
كل الافلام مشينه .. وكل المسلسلات تافهه .. وكل الكتب لاتقول شيئا
كل الزوجات الاخريات سافلات .. وكل الازواج خائنون
كل أصدقائه أوغاد .. وكل صديقاتها ثرثارات
الخلاصه أنها وصلت الي السلام بشكل تام مع غوامض هذا الكون
كل شيء أسوأ ما يمكن .. أو تكمن وراءه خدعه ما .
وكانت عبارتها الخالده هي :
" لم يعد الناس كما كانوا "
لاتعرف أبدا متي كان الناس ( كما كانوا ) فلابد أنها كانت تعيش
في العصر الباليوزي حين كان الناس علي خلق .. لا يخدعون أحدا
لسبب بسيط .. هو أنه لم يكن هناك ناس في ذلك العصر ...
لما قريت الكلام ده طبعا وقعت من الضحك وحسيت إنه بيتكلم عن لساني
لما كله بيقول زمان الناس كانت كويسه .. طب هو فين الزمن الي كانوا ناسه كويسين ده
حاجه كمان بتفقع مرارتي تلاقي كل واحد يقولك :
يا جدع الناس بقت وحشه كله بياكل بعضه .. محدش طايق حد
محدش .. محدش .. طيب لما كل الناس بتقول كده
أمال الحراميه . والنصابين . والي بيشتموا . والي بيسبوا دين
والي بيقتلوا . والي بيزنوا . والي بيشربوا خمر. والي بيختلسوا ..
والي .. والي . والي لو قلت فيهم مش هخلص
المهم لما كل الناس كويسه .. وكل الناس مظلومه
الانماط ديه كلها بتطلع منين ؟؟
يعني مثلا تبقي بتتكلم مع حرامي وتلاقيه بيقولك :
الدنيا اتقل بركتها .. والشر الي في الناس
الناس بتاكل بعض ..ده لو غفلت شويه يسرقوا الكحل من العين
وإنت من جواك بتقول : يا سلام سلم أمال انت تبقي ايه !!!
زي مسئول من المسئولين تلاقيه بيهلب تهليب من خلال منصبه
وطالع في برنامج بيتكلم عن الفساد والغش والاختلاس وخيانه الامانه
وطبعا المُّشاهد بيستمر في ضحكته الصفرا الساخره
ماتفهمش الدنيا ديه ماشيه ازاي ولا فيه ايه
ولا الناس بتفكر ازاي ولا فـ ايه
ولا الناس عايزه ايه
المهم في الاخر نقول " الحمد لله الذي عافانا مما ابتلي به غيرنا "
ونقول : الي خالقها هو الي قادر يعدلها
سبحانك يارب
تمت
....................
ملحوظه : ده بوست انا كاتبه من فتره لكن منزلتوش
نزلته دلوقتي نظرا لحاله الركود الراهنه
ياريت الي يقري كلامي لو إستفاد يدعو غيبا بالرحمه لي ولوالداي
هناك 17 تعليقًا:
حبيب قلبى
والله كلامك صح كل واحد بيشوف ان الزمن اللى قبليه كان احسن رغم ان اللي قبيله كان مليان مشاكل بردو زي افتكاسة ( الزمن الجميل ) اللي مطلعنها دلوقتى رغم ان بردو الزمن الجميل اللي بيتكلمو عليه كان مليان مشاكل وماكانش عاجب اهله
فكرتنى بفيلم ابو حلموس بتاع الريحانى لما بنت الباشا كانت بتقوله انت بقيت عملة نادرة في الزمن دة
بتشكى زمانها وشايفة ان الزمن اللي كان قبلها كان احسن واحنا شايفين ان زمنه فل الفل
وزي مانت قلت الحمد لله الذي عافانا مما ابتلى به كثير من عباده وفضلنا على كثير ممن خلق تفضيلا
تحياتي وحبى ليك يا جميل
اه على فكرة مستنى الحاجات اللي عايز تنشرها
ابعتلى بقى حاجاتك الجامدة جدا
ونبذة مختصرة عنك علشان اكتبها في البداية كتعريف بك
تحياتى ليك يا جميل
ههههههه عجبنى جدا البوست ده بجد هو دا حال الناس فعلا امتى الدنيا كانت كويسة هى من قديم الازل فيها الشر وفيها الخير بس اعتقد ان الشر دلوقتى بقى كتير اوى وكل الناس تحس انها مظلومة وبريئةامال مين الشرير صحيح فكرتنى بموقف واحد دخل يشترى شوية حاجات من صيدلية المهم الحاجات دى اصلا حرام انها تتاخد اللى بيقولوا عليها منومات ومهدئات واللى زى كده اللى بتغيب العقل دى وبتناقش فى اسعارها بعدين اترفز جدا وفضل يدعى على صاحب الصيدلية ويقوله انت حرامى ومش حقانى والكلام ده وانا مستغربة اصلا اصلا انت جاى تشترى حاجة فيها شبه حرمانية وبتتكلم عن الحق والظلم وانت مش بتتدى حق ربنا
جميل بجد البوست ده ربنا يرحم والدك ويسكنه فسيح جناته يارب
كيفك يا زيزوووووو
حمدا لله علي سلامتك يا بطل وفي انتظار جديدك دوما
ما تتحدث عنه يا زيزوووو فعلا من حولنا هو حالة اختلال المفاهيم لدي افراد الشعب الرائع.. السرقة الذي نالني منها جانب اسميها شطارة وغير ذلك فساد
والبنت التي اتعرف عليها تصير مزتي وغير ذلك دعارة!!
والتقاعس عن العمل يكون علي ( قد فلوسهم ) وغير ذلك لا نطيق تقاعس احدهم عن اداء مصالحنا!!
الظلم لمن حولنا نسميه حال الدنيا فاذا مسنا صار غبنا نجأر بالشكوي منه!!
عموما من يريد ان يحيا في عصر الأخلاق فد احمد خالد قد حلها..عليه بالعصر الباليوزي!!!!
تحياتي
فاكر أنا الجملة دي كويس من الرواية
و فاكر فعلاً إني قلت في نفسي وقتها
كل زمن فيه الحلو و فيه الوحش
بس المهم حالياً مين اللي باين اكتر
مين اللي التركيز الإعلامي عليه
هو ده سبب مهم من اسباب لخبطة دماغ الناس
إن البلاوي بقوا نجوم و قدوة
و شطار
و اللي بيكذب بقى بيروح مارينا مش النار
:)
عقبال يارب لما الناس ترجع تحس تاني إن اللي بيكذب بيروح النار
السلام عليكم
فعلا الحكايه دي ان كمان ملاحظها بس مقتنع الى حد ما ان كل زمان اشر من اللي قبله بس ده في العموم والا اكيد في تفاوت بين الازمان القريبه من بعضها
او ان الخير بيقل تدريجيا من زمان لاخر
حتى ان الساعه لتقوم على شرار القوم
غير ان كل زمن فيه خيره وشره لكن معظم الناس ينظرون للشر اكثر او لايرون غيره امامهم في حين ان الخير موجود ايضا وان غاب عن ابصارهم
تحياتي
لك
ومدونه رائعه
سلام
ربنا يرحمك ويرحم والديك
والله كنت بفكر في الموضوع ده بشدة في الأيام الي فاتت
كله بيدعي المثالية
طيب أمال فين الناس الوحشة؟
السلام عليكم ورحمة
الله تعالى وبركاته
اللهم اغفر له وارحمه وتب عليه وانزل عليه رحمة من عندك ووسع
فى قبره وآنسه فى وحشته وابدله
داراص خيراً من داره وأهلاً خيراً
من اهله.اللهم أمين له ولامى
وابى واموات المسلمين أجمعين .
مضبوط كلامك يازيزووو
بس ده عادى بمعنى اللى
قبلنا برضه قالوا
نفس الكلام من قلة
الخير وانتشار الشر
بس اعتقد ان فى
الزمن الحاضر
الحاجات دى
بقت اكتر
بكتير.
المهم طمنا على
امتحاناتك يارب تكون بخير.
ربنا يكرمك :)
انت قلت كل اللي بيتقال لينا كل يوم ومابنسمعش الكلام وبيدخل من هنا ويطلع من هنا
يابني احنا حالنا بيتدهور للاسف ياريت ده كان مقصور علي الحاله الاقتصالديه لكنه للاسف مرتبط بالخلاق والمباديء والمعتقدات
ده زي مالمراقبين بيقولوا عليه علامات انهيار الحضاره
الحضاره بتاعتنا بتنهار وعلي ايد المصريين نفسهم
علشان احنا بقينا كده بقينا مش بني ادمين
أنا برضه عجبتنى اوى الحته دى
المشكله أن الشر موجود فى كل زمن بس الناس دلوقتى بتتفن فيه
زمان كانو الناس الاشرار طيبه وعلى قد حالها دلوقتى بيطورو اسلوبهم
ليه لماتكره حد تفكر تقتله ماتنفذ علطول
ليه تقتله وتريحه ماتطعنه الاول وبعدين تقطعه حتت وبعدين تحرقه
وليه تقتل واحد لما ممكن تقتل 100
أنا برضه بحب الحته دى أوى
بس الدنيا اتغيرت والناس الشريره بتاعه زمان
كانت ناس طيبه وعلى قد حالهم
كبيرهم يقتلو او يظلمو
لكن دلوقتى الاشرار طورو نفسهم وأساليبهم وبقى شغل احتراف
أنت ليه لما تكره واحد تفكر تقتله ماتخش على التنفيذ علطول
ليه تقتله علطول وتريحه؟
انت الاول تطعنه وبعدين تضربه رصاصه حيموت تروح مقطعه حتت وبعدين تحرقه
وليه تقتل 1 لما ممكن تقتل 100؟
" لم يعد الناس كما كانوا "
لاتعرف أبدا متي كان الناس ( كما كانوا ) فلابد أنها كانت تعيش
في العصر الباليوزي حين كان الناس علي خلق .. لا يخدعون أحدا
لسبب بسيط .. هو أنه لم يكن هناك ناس في ذلك العصر ...
مفيش كلام يتقال بعد كلام احمد خالد توفيق
كلامك
كله صح فعلا
واننا متفقة معاك
وعجبتني مدونتك جدا فيها فكر وافكار ومش مملة
وربنا يغفر لوالدك
ويرحمه وتكون انت الابن الصالح اللي تدعو له
ويحسن ختامنا كلنا
وسعدت بزيارتك ليا
ولا يزعجي ابدا نوعية الردود بتاعتك بالعكس باسعد بيها جدا
واتمنى دوام التواصل
تحياتي
ربنا يرحم والدك ويغفرله
===
سبحان الله كنت لسه بفكر فى الموضوع ده
واقول لما كل الناس بتبان انها حلوة واخلاق أمال الناس الوحشة دى بتيجى منين
واستنتجت ان كل واحد شايف نفسه ملاك وعايز يقنع اللى قدامه بكده
يعنى من الاخر الناس بقت تكذب الكذبة وتصدقها
===
على الهامش: احييك على أختيار احمد خالد توفيق ككاتب مفضل ليك فهو ايضا من أفضل الكُتاب لدى
إرسال تعليق