"شمس الجمعه "

يوم ما طلعت شمس الجمعه

إفتكرت يوم القيامه

الي بلدنا فيه من سنين

إفتكرت قّّسم الخيانه

الي بيحلفه كل المسئولين

يومها شوفت الجنه في الميدان

لمست إن شعبنا ماعرفش يوم الأحزان

لقيت الورد من غير لون

وإتصبغ بنهر الدم المقدس

لقيت قنابل بتفجر ضحكتها

لما بتحرر روح المؤمن

عرفت إننا لسه بخير

لما إتشّبكت إيد الشيخ والمقًّدس

كانت جوايا بذور الشك

مرويه بمطر اليأس

لكني كنت كما دكتور نسا

مؤمن بولاده ثوره من البدايه

ثوره ميلاد صرخه.. خارجه من رحم الموت

كنت مؤمن

أيوه مؤمن بالله وبالثوره

لكني كافر

أيوه كافر بالغباء

كافر باليأس وخيانه الأتفاق

عصيت لما قالوا حرام الثوره ع الحاكم

هو السكوت ع الظلم بقي عباده ؟؟

سديت وداني ونزلت علي الميدان

ماخفتش لما قالوا لو نزلت هتموت

قالوا خراب .. قالوا سراب

قلتلهم مش أي حد يقدر يدوق الأحلام

وإنت؟؟

وإنت ساكت وإصطنعت الصمم

صبيت للجبن جواك هرم

حابس نفسك في الكرار

وفي الفضا سبقتك الأمم

ولسه زي ما إنت ساكت

ويوم ما نطقت ..خونتني

سّبحت وسجدت للجلاد

وهتزعل عليه لو مات

وهتفرح لو قتلتني

ووقفنا في معبد الألهه

كل واحد عنده حكم

قالوا: إقتلوه .. إحرقوه .. إشنقوه أو إجلدوه

وأخر أحكامكم : قولتوا ده خاين لازم بره البلد ترموه

لكن ربنا العادل

كشف كيدكم العظيم

وهزم الاحزاب .. ونصر عبيده

لأنكم عاجزين

كنتوا ألهه مزيفين .. وكل شيء بأمره وبإيده

ورجعت الأرض من الغاصب

رجعت طارحه ورود شهيده علي الحريه

ناس إنطفي عمرهم علي الأرض

ورجعوا كما النجوم في السما

ضحوا بشموع عمرهم

لاجل ما ضيكم يبان

لاجل تعرفوا معني البطوله

وتحكوا التاريخ لكل ذريه

إيه قيمه حياتنا

لو عايشينها كما التماثيل الشمع

إيه قيمه عينينا

لو غميناها وحجبنا عنها الحقيقه

تفتكروا لو كان جوانا روح

تعيش حره تطير

ولا تكون كما الضل

محبوس تحت النيون

بتنطفي وتختفي لو إنطفي فوق منها ضيه

وترجع لو رجع نوره يبقي ليها مطرح

ويبقي السؤال

يالي تقول نبقي نرجع نثور تاني

هي العروض بتبقي كل يوم في المسرح

.............

شكرا لكل الناس الي سألت وأنا غايب

حمد الله علي سلامتي بقي

:))