بيني وبينك

بيني وبينك كتير
زحمه وفرقه وطوابير
في الشر او في الخير
ولسه السكه طويله
وعقبال ما اوصلك كتير
بيني وبينك كتير


بيني وبينك .. بين
يا صبيه يا توب .. الزين
لو أقدر هشنق نفسي بضفايرك
ويفضل حبك فــ رقبتي ..دين


بيني وبينك كربه
وأخدتني منك غربه
وواحده هتاخدني غيرك
وفــ يوم هتاخدني تربه


بيني وبينك حرام
نعيش حياتنا في ظلام
نفسي أجي وأتقدملك
بس زماننا عايزلنا الحرام


بيني وبينك خطاوي
وعــ الجواز أنا كنت ناوي
فــ تعالي ندخل في روايه
ونتجوز في الوهم زي الحكاوي


بيني وبينك مفيش
دا انا فــ حبك من الدراويش
إفتحي باب قرابينك
لاجل أقدم عقد وردي
وشويه قمح دشيش


بيني وبينك بلاد
بسوق عليكي عباد وعباد
وكل ما أحاول تتقطع الخريطه
ويظهر طريق حبنا سواد


بيني وبينك رقايق
أو سنين جري أو دقايق
أقولك علي حاجه
وبلاش قلبك يتضايق
انا وأنتي في الزمن ده وهــــم
مش حقايق