خمس سنين ونص

انا عندي خمس سنين ونص
بروح مدرستي سبعه
وبنام باليل تسعه ونص
بيعاملوني دايما علي إني طفل
زي دبدوبي وزي باب البيت والقفل
كل حاجه أعملها عيب
كل حاجه أقولها عيب
حتي لو خبيت شوكلاته
او مصاصه جوه الجيب
لما عمي بييجي يزورنا
قوام يسألني
نفسك تكبر وتبقي إيه
أقوله ظابط او دكتور
أو حتي أركب سفينه أعدي بيها
كل البحور
وبعد ما يمشي بحكي للعبي
إني نفسي ابقي ممثل
أو حتي لاعب كوره
ونفسي العب ويا أصحابي
كوره وبلي وأكسب فوره

يوم عيد ميلادي
بلاقي بابا وماما وأصحابي
واقفين جنبي بيطفوا الشمع
وكل واحد ماسك هديه
ومافيش هديه زي الي في بالي
وبابا وماما بيبوسوني ويقولولي
يارب تفضل دايما جنبنا

تعرفوا

نفسي يوم أفتح هديه
ألاقي فيها طياره ملونه
أقف بيها فوق السطوح
وأجري بيها هنا وهنا
تطير فوق ويا الحمام
وأبعت سلامي معاها لربنا

نفسي أرسم ورده حمرا
وألونها بألوان خشب
نفسي أمسك لون الشمس
واجري علي اصحابي اديهم دهب
كل ما بحلم حلم
أحكي لإصحابي يضحكوا عليا
نفس امشي مع القمر
زي ماهو بيمشي معايا
نفسي عروستي تبقي حقيقه
وأحكيلها وتحكيلي حكايه
نفسي أعد النجوم
وأمسكها بإيديا
نفسي أغني نفسي أطير
نفسي أتنطط وأركب خيل
وأدي لقمه لمحتاج غيري
نفسي دايما أعمل خير

بحب العب علي السجاده
وأجري وأسيبهم وتلمهم داده
نفسي أسهر ع الكارتون
جريندايزر وكابتن ماجد
والسنه كلها تبقي أجازه
لا باص ولا درس ولا أعمل واجب
لكن أصحابي هيوحشوني
اصلي بحب العب معاهم
زي ما هما بيحبوني
ولازم في مدرستي ابقي شاطر
عشان أكبر وأقرا ويدوني شهاده
نفسي أحكيلكم عن عمو كمال وطنط عزه
وعن أصحابي الي اتعوروا هناك في غزه
ونفسي احكي عن الي حصل يوم الحد
لكن دلوقتي ف كتبي برص
وانا دلوقتي لازم انام
اصلي الساعه دلوقتي هتبقي
تسعه ونص