إديني عقلك ( مبروك لمصر )

تحديث: البقاء لله توفي إلي رحمه الله تعالي

والد "المعتصم " اخونا وزميلنا العزيز في التدوين

صاحب مدونه " مش عارف "

اللهم اغفر لوالده ولوالدي ولجميع المسلمين الذين
شهوا لله بالوحدانيه ولنبيه بالرساله
وماتوا علي ذلك
اللهم تقبله وتقبل منه أعماله
اللهم تجاوز عن سيئاته وارفع درجاته
وغسله بالماء والثلج والبرد
اللهم إرزقه دارا خيرا من داره واهلا خيرا من أهله
وزوجا خير من زوجه
اللهم إنس وحشته وإرحمه من ضيق القبر
وظلمته ووحشته وانر قبره بنور وجهك الكريم
اللهم أدخله الجنه جوار النبيين والصديقين والشهداء
وارحمه وارحم والدي وجميع المسلمين
اللهم أمين
اتقدم بخالص العزاء للأخ العزيز
وان يلهم الاسره الصبر والسلوان


.............................


السلام عيكم ورحمه الله وبركاته

ازيكم جميعا ( روتين بقي لازم اسلم واطمن عليكم )

يارب تكونوا بخير جميعا احب اقول قبل كل شيء

الف الف الف مبروك لمنتخبنا والف مبروك لمصر كلها

علي الكاس وتحقيق رقم غير مسبوق

وإننا نكون اول دوله تاخد دوره 3 مرات

ويبقي مركزنا العاشر علي العالم

وكالعاده مش جديد علينا بس أتمني المره الجايه ماتبقاش في الكوره

تبقي جايزه كبيره زي نوبل في اي مجال في العلم

بجد المنتخب شرفنا قوي ولعب حلو قوي

والاهم من ده كله اول شيء ساعدهم هو توفيق ربنا

وبحب اهني كابتن حسن شحاته علي التشكيل والتدريب والمستوي فوق الطبيعي

الي وصل ليه المنتخب وبشكر كل حد ساهم في النجاح ده

سواء من الجهاز الفني او اللاعيبه او المعلم

وطبعا ده غير إستقبال الرئيس للمنتخب كان احلي تشريف وتحفيز

ربنا ينصر مصر في كل شيء ويارب تعلي وتظهر في باقي المجالات

وبحب اقول للناس الي بتقول إنها هيافه اقولهم سيبوا الناس تفرح

اهي حاجه تجمعنا وتفرحنا بدل ما كل ايامنا غم

والوطنيه ومصريتنا مش كوره لكن بنشجع ولاد بلدنا ومصريتنا هي هي

مع اي حد بيشرف وبيمثل مصر سواء في العلم زي زويل ومصطفي محمود

وغيرهم او في اي مجال تاني والف مبروك كمان مره

ونقول جدووووووووووووو جدوووووووووووو هو هو

وعايز تهده هاتله جدووووو

D :D:

كفايه بقي هزرنا وهنينا مصر ندخل بقي في الموضوع


............................



بما إن الكل لسه مخلص إمتحانات

وعقبال الي لسه مخلصوش فالموضوع بيختص بالدراسه

فمثلا انا طالب جامعي في اول سنه

يعني لسه طالع من الثانويه العامه طازه

الجامعه مجتمع جديد عليا .. كان نفسي ادخل كليه كويسه ولما دخلت كليه ..

إتصدمت وياريتني ما كان نفسي ادخلها !!!

طيب ازاي انا ادرس كل الكم ده .. والمحتوي الصعب ده وانا لسه ف اولي جامعه

يعني ما ينفعش المواد تتقسم او الكم يصغر


طيب شوفوا كده الي دار في دماغي ده ( يمكن اكون غبي ولا حاجه )

اولا : محدش ينكر إن الدكاتره بتحط الكتب من المراجع

طيب مش المفروض الدكتور وظيفته يقرا المراجع ويحط محتوي الكتاب مبسط

عشان يناسب عمرنا وعقلنا

طيب علي الاقل يشرح في المحاضرات بدل ما هو بيحط الكتب من المراجع

ويدخل المحاضرات يقرا من الكتب وكإنك يا ابوزيد ما غزيت !!!!

طيب نظريه بسيطه كمان فكرت فيها ( يمكن اكون اغبي واغبي )

الي وضع المراجع ديه هل وضعها مره واحده أكيد علي مدار كذا سنه

من ابحاث وتجارب طيب إزاي يدرسوهولنا إحنا كطلبه

يعني الي إتكتب في سنين ناخده إحنا ف تيرم ولا ف سنه !!!!

طيب يا تري الي وضع المراجع ديه كان عنده كام سنه وقت كتابته للمراجع ديه

او وقت تدوينه أو تدوينهم لمجموعه الافكار او النظريات الي في المراجع ديه

من المؤكد ولا بد إن الماده المتعلمه تكون مناسبه للعمر العقلي للمتعلم

يعني عمر الكاتب العقلي مش قد عمرنا العقلي ..

وعمر الكاتب الزمني مش قد عمرنا الزمني يبقي إزاى ندرس أحنا كل ده ؟؟؟

والاهم من ده كله طريقه الامتحانات والدش وادخل اطبع في الامتحانات

وبعدها إنسي الي أخدته.. هو ده العلم الي هنستفاد منه ؟؟

إزاي كمان طالب الطب يكون سهل عليه التشخيص وهو ماجربش التشريح

وإزاي الكيميائي او طالب العلوم يبتكر شيء او يكتشف اي شيء

من غير معامل متطوره تساعده علي ده

إزاي طالب الهندسه هيطلع فاهم كل شيء من غير ما يزور مواقع

ويدرس ويعرف كل شيء علي الطبيعه منين هيبتكر او يطور

او يوصل لتمام الفهم

وكذلك باقي الكليات الي محتواها ومضمونها بيحتاج لتدريب وتجريب

يعني من خلال نقص المعامل والامكانيات ونقص الفهم والتدريب العملي

إزاي هنطلع جيل فاهم قادر يواجه اي تحديات وقادر يطور


ويبتكر كمان نظريات ومسارات تتدرس من بعده ؟؟؟

اي دوله عايزه ترتقي لازم تبقي الدعامه الاساسيه ليها التعليم

وإحنا اكتر شيء متدهور عندنا هو التعليم

طيب هل ديه ممن تكون سياسه إنهم مش عايزين يعلمونا تعليم صح

عشان مانفهمش وتتفتح عقولنا علي حاجات تاني أكبر

او مانطالبش بحقوقنا البسيطه

ولا هل ديه سياسه عالميه ومخطط مقصود بيهم تخفيض ميزانيه البحث العلمي

وعدم تعزيز وتحفيز اي افكار ومخترعات جديده

عشان نفضل بعيد عن ركب التقدم ونفضل نتحايل وناخد المعونه ونقعد علي جنب

كلام كتير عايز اقوله بس الواحد مابقاش عارف إذا كان صح ولا غلط

ولا مين صح ومين غلط ..

ولا مين مصلحته فين

بس في الاخر هقولك

إقرا كلامي وفكر فيه وإذا لقيت حل يبقي


إديني عقلك


.....


بعد الغم ده ههدي للناس الي شايفين إننا مزودينها

صور للمنتخب بعد الكاس

وسمعني سلام بلدي يا غاليه عليا

D:











الف مبروك لكل المصريين

تحياتي