لما تكون إنسان مش بتحب تكسف او تزعل حد منك
اي حد بيطلب منك حاجه مش بتقوله لا
ولما بتسلف مش بتبقي متضايق بل بالعكس
بتحس نفسك مبسوط إنك خدوم وإنك كويس مع الناس
طيب إتخيل لو إنت سلفت حاجه او كذا حاجه والي مستلفها صاحبك
يعني عادي في اللاذيذ ، والحاجه قعدت عند واحد فيهم بتاع شهرين
وغيره خلص مصلحته بيها ، والاتنين ماجابوش الحاجه الي مستلفينها
وإنت احتجتها وداير تلف علي ناس تانيه تستلف منهم
حاجه مكان حاجتك لحد ما يرجعوها
إيه موقفك ساعتها ؟؟؟
يعني هل مش هتضايق ؟؟
يعني المفروض والي اعرفه واتربيت عليه
إن المفروض لما الواحد بيستلف اي شيء
الطبيعي اول ما يخلص مصلحته بيها
يرجعها لصاحبها ، ولا لازم تقعد عنده بالشهور
وساعات بالسنين والله عشان تروح تطالبه بيها !
طب مش المفروض هو يكون إنسان حسيس ويجيبها من نفسه
ويعفي نفسه من حرج إني اروحله واقوله يا بارد هات الحاجه
ولا انا غلطان ؟؟
طب مش الطبيعي برضه إنه زي ما جه وأخد الحاجه ييجي يرجعها
ولا هو ييجي ياخدها وعشان بعد كده مابقاش ليه مصلحه تاني فيها
إنت تروح وتاخدها منه !
وابسط رد لو جيت سألت وقلتله : إنت مش خلصت مصلحتك بيها مش المفروض
ترجعها ، يرد بكل بساطه : اصل إنت ماطلبتهاش !!!
يعني هو انا لازم اطلبها عشان تجيبها
وممكن واحد تاني ابسط من الي قبله يقولك : طيب ما انت مش محتاجها !
طب إنت مالك إن شاالله اعملها خيشه او حتي لو كتاب اعمله مراكب
إنت يخصك في ايه هي بتاعتك ولا بتاعتي !!!
في عز ما انت متغاظ إنك يوم ما إحتجت حاجتك مش لاقيها
ورغم ده كله تستخدم الذوق وتنقي اقل طريقه تفهمهم بيها
إن ده شيء مش كويس
وتقول يا جماعه ديه قله ذوق المفروض الي ياخد حاجه يرجعها
يزعل من الطريقه ويقولي : يعني انا ماعنديش ذوق ؟؟
اقوله اي حد بيعمل كده يبقي ماعندوش ذوق مش لازم احرجك عشان
تجيب الحاجه خليك حسيس وهاتها من نفسك
يعني هو مفيش بين الاصحاب ذوق ولا إيه بالظبط ؟؟؟
يقولي إحنا اصحاب ومفيش بين الاصحاب حاجه زي ديه
ويقولي انا ليا حاجه عند واحد صاحبي ليها بتاع سنه عنده
وصاحبي ليه حاجه ليها بتاع 3 شهور
قولتله والله إنتوا احرار مع بعض لكن انا مابحبش كده
واقوله الي بقوله صح ولا لا
يقولي في الرسميات صح لكن في العادي مش صح
اقوله يا عم الصح صح مافيهوش رسميات ولا زفت
يقولي صح من وجهه نظرك والعمليه قلبت علي فلسفه افلاطونيه
اقوله ده الصح من وجهه نظر كل الناس ،دا انا اجيبلك عيل صغير يقولك الكلمتين دول
بعد كده العمليه دخلت في إن مفيش حد بيشوف نفسه غلطان
وإنت مش واخد بالك من طريقتك
ورغم إني مختار اذوق طريقه اقوله بيها برضه زعل
وشويه دخلنا في المنطق المطلق وإن الصح ده من وجهه نظرك
والكلام الحمصي ده الي لا يجيب ولا يودي
قولتله يا عم فيه حاجات صح مش محتاجه جدال ولا نقاش
وكذلك حاجات غلط
قولتله زي كذا حرام حرام ليه ، عشان كذا كذا
وديه حلال حلال ليه عشان كذا وكذا
مافيهاش اني اقولك حلال من وجهه نظرك
وحرام من وجهه نظر غيري
في النهايه انا قفلت في الكلام
ومشيت عشان اتكسحت وصدعت
يا تري مين صح ومين غلط؟؟؟
اما حكايه المنطق المطلق
فإن شاء الله الموضوع الي جاي
معلش انا عارف إني رغيت كتير وصدعتكوا
بس معلش انا مش بفضفض كتير
فإستحملوني بقي
علي رأي عوكل " إدونا فرصتنا بقي "
D:
مستني اسمع أرائكم بصراحه واناقشكم فيها
هناك 6 تعليقات:
السلام عليكم
ازيك يازيزو
يارب تكون بخير
طبعا حكايه ان الواحد يسلف حاجه لحد محتاجها اوى يدخل تحت باب من فرج عن مسلم كربه من كرب الدنيا بس فعلا حاجه تغيظ لما حد يستلف حاجه ويضرب عليها وتحتاج تلح عليه علشان يجيبها او تحتاج تستلف على ماتجيبها واللى يغيظ اكتر لما حد يستلف منك حاجه ويروح مبوظها مثلا
طبعا حضرتك مش غلط وده حقك بس صدقنى مش كل الناس بتفكر كده وفى ناس زى ما صاحبك بيقول بتشوف ان دى حاجه عاديه قوى وانا اولهم الحقيقه علشان ممكن اسلف حاجتى وتقعد وتتنسى وممكن تضيع خالص وانا ولا انا هنا هههههههههههههه
وفعلا كل واحد بيبقى شايف نفسه صح والباقى غلط فى احيان كتير قوى
يلهوى على الرغى هههههه
كفايه كده
اقعد بالعافيه
طبعا متفقة معاك
لان لما بسلف حد حاجة مش ببقى عاطياها له كهدية دى بتبقى فك زنقة زى مابيقولوا ولو هو ماطلبهاش انا مش هديهاله
واى بنى آدم عنده احساس هيقدر ده
ويرجع الحاجة لصحابها من غير ما صاحبها يطلبها
http://monaliza110.blogspot.com/2009/07/7.html
السلام عليكم و رحمة الله ,
بص يا عم زيزو ,
الحياة مش عاوزة نرفزة على ناس ما عندهاش دم ,
و لا عاوزة واحد ( حسيس ) صدقني لو بقيت حساس هتتعب جدا ,
أحلى حاجة إنك تحاول يبقى ما عندكش دم ,
و فيه مقولة قرأتها زماااااااااااااان بتقول : " الوقاحة تتظلب وقاحة مثلها " ,
يعني طالما الطرف الآخر رخم و ما عندوش دم , يبقى ما تتعاملش معاه بذوق , لكن برضه ما تتعاملش معاه بقسوة زيادة علشان ما تخسروش ,
و اللي عنده دم اليومين دول ... بيتحرق !! فالأحسن يكون ما عندكش دم !!
تحيتي :)
مين اللى مزعلاك
يازيزووووو
قولى عليه
وأنا
أدعى له دعوة
تقعد من حــده ومن
نصيبه إن شــاء الله!
المفروض واللى مش مفروض
دا مع الناس الذوق
اللى بيفهموا لكن
لو اللى استلف
مش ذوق ومش
بيفهم بقى
يبقى لازم
له درس
وكلام
جامد وموجع كمان!
و الله يا اخي انا مش عارفة مين اللي خلى الحاجات الثابتة و المنطقية تخضع للنسبية .. !!
بجد ..!!
انا مش عارفة ايه اللي بيحصل في العالم دة ..
يعني الحاجة اللي مش بتاعتك مفيش داعي تخليها عندك و لا هو استرخاص و استخسار ؟؟
الاسترخاص و الاستخسار بقوا مباديء عادية اوي .. زي ليه تدفع اكتر لما ممكن تدفع اقل .. !!
كنت قريت مقال قبل كدة عن اثر الجملة دي في عقلية الناس و في تفكيرهم ..
و دة غيرها للجفاف و السلب ..
بقت الحاجات جافة جدا و سلبية اوي ..
بسبب منطق الاسترخاص و الاستخسار .
إرسال تعليق