الجمال وخدش الحياء

السلام عليكم

اصدقائي المدونين وحشتوني جدا جدا جداااااااااااااااااااااا

معلش علي فتره الركود والغيبه ديه

ديه كانت لظروف معينه ربنا يعديها كلها علي خير

وبيني وبينكم حاسس بإستمرار حاله الركود مش عارف انزل ايه

ولا ممكن ارجع بإيه

ومش عارف اكتب حاجه خالص

قولت انزل موضوع قديم بقي لحد ما تفرج

صحيح نسيت اقولكم كل سنه وانتوووووا طيبين

وكل رمضان وإنتوا بخير

مش عارف اقول حاجه تاني

اسيبكم مع الموضوع

مفيش شك إن الجمال شيء بيفرح النفس .. وكل إنسان لازم يبان جميل ..

وطبعا الأمثله كتير منها جمال المظهر واللبس وطبعا الاخلاق وجمال الروح والنفس

لكن انا هنا بتكلم عن الظاهر :-)

لازم ناخد بالنا إن ما بين الجمال وخدش الحياء شعره هي الحد الفاصل بينهم ..

يعني فيه مناظر مؤذيه الواحد بيشوفها بيشمئز ويقرف من الي بيعملها

نبدأ بالبنات :

مثلا تلاقي واحده محجبه ولابسه بادي او بلوزه ضيقه قوي علي جيبه او بنطلون ضيق

او واحده محجبه ومبينه رقبتها او خصله ملونه من شعرها

كمان تلاقي واحده محجبه ولابسه جيبه قصيره او بارمود او بنتاكور ( مش اسمه كده برضه )

واحده محجبه وحاطه كميه ماكياج رهيبه .. او جيبه فتحتها غريبه

ده غير باقي الي لابسين نص نص .. والي مش لابسين خالص

والحياه وردي وزي الفل معاهم

ومن اكتر الموضات الي بتخنقني وبتنرفزني جدا

حوار البادي ده علي البنطلون القرطاس ده والجزمه ام 15 جنيه ديه عارفينها

بنات كتير قوي لابساها لا وإيه الي جايبه الجزم بألوانها

طيب بالذمه هل كل ديه مناظر مش مؤذيه .. يعني بصراحه انا لما بشوف المناظر ديه

بقول اكرم للبنت تقلع الحجاب بدل ماهو مالوش لزوم وهي اصلا الي بتسيئله

والله فعلا مناظر توجع العين

الولاد بقي ( دول حبايبي ) :-)

طبعا اللبس والمظهر بالنسبه للولد مش شيء هيعيبه قوي

لكن برضه فيه مناظر مؤذيه منها علي سبيل المثال لا الحصر :

تلاقي واحد مسقط بنطلون بطريقه مستفزه ومقرفه

تلاقي فتحه القميص لحد السره والسلسله باينه وفرحان قوي بشعر صدره

تطويل الشعر بأشكال غريبه وبأطوال أنثويه او تلاقي واحد لامم شعره

بتوكه حريمي

ده غير القصات الغريبه المبتزله والتقاليع

هل كل ده مابتحسش انك قرفان لما بتشوفه

ده غير الالوان الي بتتلبس الي حتي ما تريحش العين

بالمناسبه مره شوفت واحد لابس بنطلون احمر وقميص اسود

طيب ما يعكس ده فوق وده تحت هيبقي النظر اظرف لكن اذواق

ده حتي فيه مثل بيقول

" كل ما يعجبك والبس ما يعجب الناس "

يا سيدي ماتلبسش الي يعجب الناس لكن البس الي يليق بيك

مش كل تقليعه نقلدها وإحنا مغمضين

لازم فعلا نعرف الفرق بين الجمال وخدش الحياء

يعني مثلا فيه بنات مش بتتحجب غير بعد الجواز

تلاقي واحده تخينه قوي وبتلبس لبس ضيق قوي او قصير قوي

ومش مراعيه حجمها خالص وفاكره نفسها راقصه باليه

فيه بنات بتاخد الحجاب موضه.. فيه شباب بتاخد التدين وتطويل الدقن والشعر

بدل السنه موضه .. طيب إعملوا الاساسي ثم الفرعي

لكن عقول ما شاء الله

هي طبعا كلها حريات لكن المفروض الواحد يراعي الذوق العام

والاهم الي يليق ليه والاهم إقتناعه الشخصي بالحاجه ديه من غير ما يحس

إنه غريب او حتي منظره مؤذي

وفي النهايه لازم نقول " لولا إختلاف الاذواق لبارت السلع "

تمت

بتاريخ 18/7/2008