المولد النبوى الشريف

لو كنت معدى فى أى شارع . عمرك ما هتحس بفرحة وجو الاحتفال بالمولد النبوى الشريف

( صلى الله علية وسلم ) لأن أكتر مكان ممكن تحس فية بالجو دة هو المناطق الشعبيه فى أى مكان وفى أى محافظة

تلاقى صوان منصوب فيه أشكال حلاوه المولد وأشهرها ومحلات فيها من كل نوع ومن كل صنف من اغلاها

لأرخصها .. عشان الغنى والفقير يدوقوا ويحسوا .. لأنه يوم ميخصش فقير ولا غنى

وطبعا مع تطور الزمن ظهر تطور فى صناعة حلاوة المولد النبوى ( صلى الله علية وسلم )

تشوف العروسة الى من الحلاوه من كل حجم ولون ..ومزوقينها بفستان فرح بأبهج الالوان وأحلى أبتكارات وتصاميم

وبردة من أشهر أشكال الحلوى الفارس الى ماسك سيف وراكب على حصان..

وطبعا دية من أكتر الحاجات الى بتحب الاطفال تشتريها وتلعب بيها

تسمع الابتهالات فى مدح النبى( علية الصلاه والسلام ) والتواشيح والقرأن .. جو يشبه جو رمضان

فى الاحياء الشعبيه زى الحسين .. والسيده زينب . وغيرهم من باقى الاحياء العريقة

غير انه بيتعمل مراجيح للأطفال والعاب ..وشيوخ بتقرا قرأن وابتهالات حاجات كدة زى الى فى فيلم شىء من الخوف

للفنان محمود مرسى والفنانه شادية .. عتريس وفؤاده وهما فى المولد ههههههههه

( صحيح كل دة زيادة شوية وكل حاجة بنفهمها غلط ) لكن خلى الشعب يعيش

بس بجد بعشق الجو الشعبى فى المناسبات .. رمضان. المولد النبوى. وعيد الفطر. والاضحى ..

وبصراحة لقيت فتاوى وكلام عن الاحتفال بالمولد النبوى الشريف وتحريم الحلوى والاكل والاحتفال نفسة

وطبعا أحنا عارفين انها بدعة لكن أحنا مش واخدينها بالمحمل دة .. شعبنا بسيط ومابيصدق يفرح .

قولولى بقى أكلتوا كام حتة حلاوة ؟؟؟ هههههههههههههههههههه

بالهنا والشفا

وفى النهاية لازم نستفيد باليوم دة ونقول:

اللهم صلى وسلم وبارك على سيدنا محمد وعلى اله وصحبه أجمعين الى يوم الدين

وقال رسول الله (صلى الله علية وسلم ): من صلى علي صلاه صلى الله عليه بها عشره

وقال نبينا الكريم محمد (صلوات الله وسلامة علية ): من صلى علي أدركته شفاعتى

وسئل أحد الصحابة النبى الكريم : من البخيل ؟؟ فقال لهم: البخيل من سمع أسمى ولم يصلى علي

اللهم صلى على محمد وعلى أل محمد كما صليت على أبراهيم وعلى أل أبراهيم..

وبارك على محمد وعلى أل محمد كما باركت على أبراهيم وعلى أل أبراهيم ..

جعله الله وأعاده علينا وعلى الأمه الاسلامية بالخير واليمن والبركات

وكل عام وأنتم بخير