الشروق
والصباح الي إتفرد
على كل شارع إتصبغ بدم الولد
الضحى
والليل الي خلي من العباد
مابقاش فيه غير مجتهد
واقف مستني طلقته
جوه الميدان
داير يوزع دمعته
على كل الي خان
خان دمه
يأّس أمله
طعن شرفه
بلسان جبان
الشروق
والصباح الي إتفرد
على قلب مات لما إتولد
قلب الصبي
الي إتمزق وأخدتوا منه فرحته
مات ما إترزق لما سرقتوا ثورته
ماعرفش يفرح بالشهاده
لما الدياثه بقيت عباده
وسابوا أخته تشرب هوان
قلب الصبي
صرخ وقال مش هو ده مطلبي
أنا دمي راح وكان نفسي أعيش زيي زيكم
انا لما أحارب ظلم وطني
ابقى ف نظركم موتي ده عيد
ولما أحارب أجنبي
أبقى في عينيكم رمز وشهيد
دي ثوره كانت من الله هديه
وبتضيع علينا من 100 إيد غبيه
وبترجع فيها لربها نفوس كتير راضيه ومرضيه
لكنها .. رغم إنها .. كان نفسها
لكن ماهوش مكتوبلها
تكون مرضيه
والصبيه
الي كست عينينا بتوبها الطويل
الي فضت ستر كل نفس
صرخت وقالت كفايه لحس
كفايه مسح في البياده
لو ترضوا إرضوا تبقوا عبيد
إيه الجديد
والحر تبقى ليه السياده
وكان الهتاف
كان الهتاف
سارق الثوره فوق الكتاف
حادي بادي أنا خنت بلادي
وقال الظالم إسجدوا يا عبادي
قام العسكر حرق وكسر
موت شاب وشيخ من الأزهر
عشره عشرين تلاتين أربعين
إقتل وحاكم مدنيين
خمسين ستين سبعين تمانين
قول الي عملها دول ناس تانيين
والي فاضل تسعين والميه
قالوا عليهم بلطجيه
وطلقوا عليهم الحراميه
سحلوا صبيه
بكشف عذريه
وإتظبطت .. التمثيليه
كان فيه واحد جبار
حب يفرق في الثوار
يعمل إيه ؟؟
وطنه مابقاش غالي عليه
ليه يصونه ؟؟
كام بلطجي يلزمه ؟؟
وكام قناص
يقتل يفرق من غير رصاص
وكمان تطاطي
من غير خرطوش .. من غير مطاطي
و" دخل" بمصر من غير جهاز
وكشف جسمها بقنابل غاز
وعزمها بره على أكله سم
وملى كاساتها
وشباب ولادها
ودموع بناتها
بشوارع دم
الطريق
والسكه الي صعبه
والليالي الغربه
هتشيل أخوك للمشرحه
وإقرا عليه قداس وفاتحه
ودور بيه جوه الميدان
حفظ إسمه لكل عامود
إحلفله إن حقه هيعود
وإن الكلاب هتفضل تنبح
مهما الليالي لسه هتجرح
الفجر
ونور الشمس
وصوت الأدان
الي طالع من كل جامع .. من جوانا
والفضفضه
وليالي الرصاص
وساعه الحماس
وأخويا الي واقف هناك عشاني
وصخب الأغاني
والمستشفى الميداني
والقلب الي بيسرق منك أمان
والشهيد الي نفسه يرتاح ينام
إفتكري دايما صوته يا بلد
إفتكري لما قالنا
عمرنا ما هنعرف معنى الكرامه
إلا لو كان
أهم حاجه عندنا
دم الشهيد
قبل النشيد
هناك تعليقان (2):
قصيدة جميلة تحمل معاني قيمة
وتدل على وعي وادراك لما يجري على الساحة
الرحمة لجميع الشهداء.. والمجد للثورة والثوار
وعايزة اقول ان الثورة لن تموت طالما فيه ناس واعيين للي بيحصل
استبشر خير يا اخى بكرة اكيد احلى واجمل مادام هناك مثل هذا الصبى اللى خايف على تراب بلده وبيحميه بدمه ,, مصر لسه بخير وولادها لسه بيحبوها وهيدافعوا عنها لاخر قطرة فى دمهم
إرسال تعليق