نبتدي منين الحكايه
في الفتره الأخيرة بقيت احس اني غاوي اختلاف في كل المناقشات
بقيت احس ده في معظم تصرفاتي مع كل الناس اللي حواليا
مش عارف ليه اثناءالحوار دايما بدورعلي ثغرة ممكن من خلالها اشكك في وجهة نظراللي بيكلمني
وعلي الرغم من احساسي ده الا اني في نفس ذات الوقت عندي احساس اني صح
وهجيبلكم بعض الحجات اللي علقت معايا
عندك مثلا
في مناقشه بين اصحابي مجموعه منهم مع الحكومه وشايفه الدنيا حلوه وزبادي ف الخلاط واننا والحمد لله عايشين احسن من غيرنا كتيرودول طبعا بيعترضوا علي السفر وبيقولوا ( ان عويل بلاده عويل بلاد الناس )
ومجموعه تانيه بتقول ان الدنيا ضلمه والبلد من سئ لأسوأ
طبعا كنت مختلف مع الكل وقلت بلاش الكلام المرسل عشان مصر فيها حجات حلوه زي الدعم في التموين واشتراكات السكه الحديد والعيش والتأمين الصحي ونفقة الدولة وطبعا ده عجب اصحاب الرأي الاول ولقيت اصحاب الرأي التاني بيقولولي عيش ايه دا عيش بمسامير ميتاكلش , اللي موفرين لنا الدعم مبياكلوش منه وسكك حديد ايه شوف عربية القطر الواحده بيبقي جواها مليون والناس زي الطماطم في الصلصه والتأمين الصحي ونفقة الدولة مفيهمش الادوية الغالية والرعاية الصحية زي الزفت .
لقيتني باخد منهم طرف الحوار واختلفت مع المجموعه الاولي وقلت فعلا البلد زحمه وتخنق والتعليم المجاني مبقاش مجاني وازاي يطلع مبدعين في فصل جواه سبعين والشغل ازاي في وجود الواسطه والرشاوي ولقيتني اتفتحت في سيل من المشاكل مع اني اصلا مبحبش اتكلم في المشاكل معدومة الحل زي دي .
وكمان مشكلة تانيه بتاعة المعاكسات والتحرش ومين السبب فيها
ناس تقول ان البنات لبسهم فاضح وهما السبب هتلاقي واحد يرد بانفعال انتو ليه ظالمين البنات انا مره شفت بنت منقبه اتعمل فيها كذا وكذا والشباب اصلا مش متربيين ومقضيينها كليبات ونت
يقول الأول وليه البنت متلبسش كويس وربنا يهديها يقوله التاني وانت ليه متغضش بصرك وربنا يهديك
وهنابقي ييجي دوري وانا قاعد اسمع الحوار بدور زي مانتو فاهمين ع الثغره
وابدأ كلامي وانا راسي كده واقول انتوا عارفين المشكله فين
المشكلة ان المجتمع بالكامل عايز يتعالج نفسيا
الشباب وبحثهم عن مبرر للي بيعملوه من انهم مش قادرين يتجوزوا والبنات بقت مستفزة
هقولهم ربنا بدأ بالرجال فقال تعالي (قل للمؤمنين يغضوا من ابصارهم ..)
والاية اللي بعدها كانت للنساء ( وقل للمؤمنات يغضضن من ابصارهن ...)
وكمان لو مش قادر تتجوز سيدنا محمد محطش حلول تانيه قال (... فمن لم يستطع فعليه بالصوم ...)
بمعني انه محصلش اباحه لاي شيء من الحجات الغلط اللي بتحصل الايام دي
والبنات كمان عليهم دور كبير انا عارف ان البنات بتقول انا حره وربنا هو اللي هيحاسبني
انا متفق معاكي , لكن من باب الامر بالمعروف والنهي عن المنكرعايزك تعرفي انك كده سايبه فريضه ربنا امرك بيها عايزين نرتقي بالمجتمع وايدينا ف ايدين بعض
ولي الامر سواء كان اب أو أم اوأياً كان مفروض يكون في رقابه بحدود علي الولاد والبنات
ومتابعه للتصرفات وملاحظة الحجات الغريبة ومينفعش ولي أمر يقعد جنب ولاده ويتفرجوا علي مسلسل فاضي او فيلم فاضح ونتكلم بعد كده علي مشاكل التحرش
وبالشكل ده الاسرة اصبحت نوعاً ما افضل وبالتالي مجتمع افضل وكيان متكامل افضل
ده كان رأيي طبعا اختلافات بالهبل مع الكل واصوات عاليه وانا في انتظار الثغرة وأول لما الاقيها ابدأ بقي في الكلام والقاء النظريات
بس مش دي المشكلة , المشكلة اني وانا معاهم مكنتش مركز في الحوار اد ماكنت مركز مع نفسي انا ليه بختلف معاهم كده انا ليه بدور علي الثغرة اللي في كلام كل اللي بيكلموني
أوقات بزعل من نفسي بحس انها ابداء رأي واعجاب بنفسي اكتر من كونها نصيحه
حاجه تزعل بجد
لكن انا لازلت
في انتظار الثغرة
د / ابراهيم ابوالمجد
..........
اكيد واضح إن الموضوع ده مش بتاعي
ده بتاع دكتور /ابراهيم ابو المجد
اخونا المدون الشهير" ببرقش "
لينك الموضوع
وده إحياء لموضوع من موضوعاته
عشان انا بجد نفسي يرجع
وبزعل لما أي حد كويس بيسيبنا
وللأسف الناس الي مش بنحب وجودها
او الي وجودها بيزعجنا بيفضلوا موجودين
انا طبعا مش قصدي حد معين
بس اقصد اي حد
بيروج لفكره مش مقبوله
او فكره مشوش وغير موجه
وغير مفيد بل مضر
او من الناس الي بتضايق اخوانا المدونين
بالتعليقات اللاذعه او بالتجريح او بالغيبه
انا هعتبر الموضوع ده مجرد عتاب
لدكتورنا الجميل ونداء عشان يرجع
وأتمني يشوف النداء ويرجع
ياريت يا جماعه كل حد يقدر
يدعيله ربنا ييسر اموره
ويرجعه بالسلامه
ويهون عليه المصاعب
والاهم إن الموضوع مهم فعلا
لإني لاحظته في ناس كتير قوي
فعلا بتدور علي أي ثغره في الكلام
عشان تختلف وتنقد
ومرت عليا فتره وكنت كده بس الحمد لله
ملحوظه :معلش يا جماعه إني مش بنزل حاجه
وإني مش بزور حد
بس مشغول شويه وكمان الكي بورد إنتحر
ياريت لو قدرتوا تدعولي دعوه بسيطه
ربنا يهون عليا وعليكم مشاق الدنيا
ويغفر لكم ولي ولوالدي ولجميع المسلمين
والمسلمات الاحياء منهم والاموات
أمين يارب العالمين
