....................
السلام عليكم ورحمه الله وبركاته
موضوعنا النهارده بيدور في حلقه مفرغه وواسعه في نفس الوقت :
موضوعنا النهارده بيدور في حلقه مفرغه وواسعه في نفس الوقت :
بيت واحد فيه أخ مش بيحبش اخوه . وزوج مش بيحب زوجته
جيران في بيت واحد وشارع واحد مش بيحبوا بعض وعلطول خناقات
عيلتين بينهم خلافات ومشاكل وبرضه بيكرهوا بعض
المنطقه الفلانيه بتكره المنطقه التانيه وبيقولوا علي بعض كذا .. كذا ..الخ
المركز الفلاني بيكره المركز الفلاني في نفس المحافظه
المحافظه الفلانيه بتكره المحافظه التانيه وبتقول علي أهلها دول مش رجاله و..و..و .. الخ
الدوله ديه بتكره الدوله ديه وبينهم مشاكل ونزاعات طويله متوارثه ومتداومه
وهكذا .. وهكذا ..وهكذا
طيب انا كل ده عايز اقول إيه ؟؟؟
انا عايز اقول مش مصر بس الي بتفكر كده العالم كله .. نحلل واحده واحده :
لما أخ مش بيحب اخوه وبيحصل لأسباب كتير بدون ذكر وإن موصلش لدرجه الكره بيبقي نفور وخلاف وخصام
ولما الجيران بتكره بعض .. العائلات .. المناطق .. المراكز .. المحافظات .. الدول
طيب هوضح أكتر : لما ناس تكره بعض في بيت واحد ده يبقي ايه إزاي هيقدروا يعيشوا مع بعض ؟؟
ونفسي افهم ليه بيقوم نزاع بين مناطق وبعضها ومراكز في محافظات واحده
وأكتر من محافظه وسياسه البقاء للأقوي .. ولما يتطور النزاع بين مصر والدول العربيه ..
الدول العربيه وبعضها .. العالم كله وبعضه ...
يبقي أولا : إزاي بنسئل ليه العرب بيكرهونا .. طيب ليه بيكرهوا بعض .. طيب ليه إحنا بنكرهم ..
ليه الغرب بيكرهنا .. والدول الغربيه بتكره بعضها ؟؟؟؟
طيب هل مثلا في ظل كل ده مطلوب مننا إننا نتحد أو نجتمع علي كلمه واحده ؟؟؟
طيب هل وارد إننا نتظاهر بالاتفاق مره ؟؟
طيب هننتظر إيه من الدول الغربيه .. هنقول إحنا رخاص عندهم ليه ؟؟
طيب ما نسئل نفسنا إحنا ليه رخاص عند بعض .. وليه بنكره وبنسب بعض ؟؟
وليه لما واحد فينا بيقع تحت ضرس التاني مابيرحموش ( انا مش بتكلم عن جنسيات )
وللأسف أكبر مثال علي كده : إجتماعات جامعه الدول العربيه قمه في المسخره
وكأنه مسلسل أقل من كوميدي مثير للشفقه السخريه
طيب ده حلو هل ديه مناظر وسلوكيات حضاريه .. طيب هل في ظل ده كله هنوصل لحل ؟؟؟
أقربها لما تلاقي إنسان واقف وبيضرب جاره ولا اخوه بمطوه مش هقول فين القرابه ولا الجيره
هقول فين الرحمه .. فين الانسانيه !!!
أما تلاقي واحد مصري طالع في جرنال ولا في التلفزيون ولا في موقع بيشتم في المصريين
أو بيحقر من الانسان المصري ديه حاجه كويسه او هو محترم !!!!
ممكن حد يقولي هنكدب علي نفسنا ؟؟؟
هقوله مش عايزين كدب ولا نفاق ولا زيف إحنا عايزين يا تقول كلمه كويسه يا تقترح حلول بنائه قابله للتنفيذ
منجزه لا تعارض دين او عرف او حقوق شخص او شيء او قانون .. مش تطلع تفضل تتفلسف
وطبعا بتشتم من حرقتك كمبرر للي بيحصل .. وياريتك حليت
يا إما تقول من غير تجريح .. يا إما تسكت .. في حديث بيقول في ما معناه ( فليقل خيرا أو ليصمت )
إزاي أتجبر علي اخويا في الانسانيه ؟؟؟
إزاي ممكن أتمني الموت لشخص والهلاك لإنسان وفي المقابل أبني حياتي علي موته ؟؟؟
إزاي أتمني لشخص شيء يضره أو أسلبه حياته وحريته وإنت متخيلتش لحظه ده لنفسك ؟؟؟
طيب ده مش ظلم ؟؟ ده مش فساد وكره .. ده مش قله خير ؟؟
لما طفل يكبر ويضرب أبوه .. هل يضمن الابن ده لو خلف مش هتتردله .. هل يفتكر إن ربنا غافل ؟؟
أي شخص بيتمني لغيره الشر أي كان سلوك الغير ولو كان قاتل بلد كامله يبقي إنسان مشوه وكله غل
ومنزوع الإنسانيه ومايملكش عقل يفكر في أبعاد ظروف واقعه من أي نوع ...يبقي جاهل
يبقي يسكت ويخرس ...
مش من حق حد يدين حد .. أو يأذي حد .. أو يتمني لحد الموت أو يسلبه حياته او حريته او يتمناله الضرر
ده ربنا غفور رحيم .. وسبحانه وتعالي رب .. إنت يا إنسان يا شويه تراب تنصب نفسك إله علي الناس
وتأذي ده وتكره ده وتدين ده .. وتحكم علي ده !!!!
طيب هل نتخيل إننا نطالب بحقوق الانسان .. طيب مش نعرف الاول هو فين الانسان ؟؟ بيتكون من إيه الانسان
من قلب متحجر .. ومشاعر أبادها الجمود والتصلب .. وعقل أحمق أفضل من أجله أن يفكر في أن لا يفكر !!!
الناس فعلا إتنزعت من قلوبهم الرحمه ..
إنت مصري او عربي أو أجنبي أو تندرج تحت اي جنسيه أو جنس او عرق أو دين بتنقد مجتمعك؟؟
ده سليم وشيء عظيم طيب ما تحاسب نفسك الاول قبل ما تحاسب الناس وتسبهم وتكرههم
شوف إنت بتكرهم ليه ..
ولو إنت شخص صحيح بتفكر .. مش تحل مشاكلك الشخصيه .وبعدها تدور علي الاصلاح العام ؟؟؟
ولوكانت المشاكل الشخصيه مرتبطه وهتقل لو إتحلت المشكله العامه ...
طيب مش تحط حلول موضوعيه .. بدل السب والسخريه في بلدك وولادها ؟؟؟
طيب السؤال دلوقتي :
هل إحنا نستحق الحياه ... هل نستحق لقب بشر أو إنسان ؟؟؟
للأسف إحنا زي ما قال عادل إمام " نحن في زمن المسخ " ( العالم كافه طبعا مش دوله بعينها )
وفي النهايه منلومش غير نفسنا لما نتشتم من الغير ..
لما ولادنا وولاد بلدنا بيشتمونا هننتظر ايه من الغريب ؟؟
بدل ما نغير مجتمعنا فعلا ونفكر بعقول ناضجه .. لا بنختلف ونختلق حلول ساذجه ..
والاهم : ناخد صفه الألوهيه نحيي ناس ونموت ناس وندين ناس ونحاسب ناس .. ونقرر مصير ناس ..
ونسلب الحياه والحريه من ناس
ونحلل ونحرم. ونفتي مفيش مانع
للأسف كل واحد فينا نصب نفسه إله علي الارض يملك كل الصلاحيات الي تأهله يمرمط البني أدم
الي رب العالمين كرمه ...
البلد ديه وغيرها محتاجين عقول بجد .. شباب تبني الصح وللغلط تهد .. كلام يقوي وللسمو والعزيمه يشد
لكن للأسف مش هنقدر نعمل كده عشان إحنا للأسف ... ألهه
يا ناس كفايه بجد كفايه ...تعبنا شعارات وكلام علي الفاضي .. وكلام هو الفاضي نفسه
بس الي عايز اقوله في النهايه إن كل شخص مش بيفكر في أخوه المسلم .. وأخوه المصري .. وأخوه العربي
وأخوه الدولي .. وأخوه العالمي .. وأخوه في الانسانيه ربنا هيحاسبه علي أي ضرر يسببه
لأن ربنا وحده الي قادر يدين ...وبقدرته يقدر يعفي ويسامح ويغفر ويرحم
وفي النهايه أحب اختم كلامي بخير الكلام :
قول الله تعالي " وما ربك بغافل عما يعملون "
صدق الله العظيم
..................
تمت
تنويه: انا سعيد جدا بالافراج عن أيمن نور
ونفسي أقوله : ده قدر الشرفاء
هناك 18 تعليقًا:
السلام عليكم ورحمة
الله تعالى وبركاته
الحب والكره طبعان
من اطباع الانسان
مش حتلاقى حد بيحب وبس
وكمان مش حتلاقى حد بيكره وبس
لازم كده وكده احنا بشر اما اللى بيحب وبس فهذا(حالم )وليس له مكان فى الحياة الواقعية واماالكاره فقط فهو
(مريض)والعياذ بالله من مرضه وشره.
..........
كلام كتير ممكن الواحد
يقوله فى الموضوع ده لكن
واه من لكن ده تعمل ايه
فى مواعييييييييييييييييييد
الشغل البايخة !لابد من الانصراف الان
ولى عودة بعد العمل ان شاء الله تعالى
السلام عليكم
ازيك يا اجمد زيزو
بجد عايز اقول ماشاء الله
البوست هايل
وانا اللي فخور بيك وسعيد بيك بجد
وسعيد اني اعرفك
حقيقي جواك حد هايل
ربنا يوفقك ومن تقدم لتقدم
تحياتي
برقش
السلام عليكم
زيزو العزيز
غرائز البشر لن تتبدل ولتتذكر ان المحنة الانسانية مع بعضها بدأت منذ ابناء ادم قابيل وهابيل
عموما ان الأهم كبداية للإصلاح ما استطعنا هو المبدأ الذي ترسيه في هذه المدونة..النظر الي الضفة الأخري والتفكير فيها ايضا بناءا علي ان الأخرين هم بشر مثلنا لهم نفس الحقوق التي ندعيها لأنفسنا
اذا ما تم ارساء هذا المبدأ بيننا بالفعل سوف نكون قد قطعنا شوطا هائلا
تحياتي واحترامي
السلام عليكم
كل ده موضوع
انا تعبت قوى على م قريته بس موضوع يستحق وتناولك ليه جميل وهادى
وربنا يصلح الحال
تحياتى
السلام عليكم
كل ده موضوع
انا تعبت قوى على م قريته بس موضوع يستحق وتناولك ليه جميل وهادى
وربنا يصلح الحال
تحياتى
احم احم ,
السلام عليكم أولا ,
بصراحة أنا اتلخبط من كتر الحاجات اللي في الموضوع ,
أصل العملية معقدة , سياسة في علم اجتماع في اقتصاد في مصالح في حاجات كتيرة جدا ,
و بصراحة مش عارف الحل هييجي إزاي ؟؟
شكلك مخنوق جدا من اللي بيحصل ..
ربنا يستر علينا و يرزقنا الوؤام و الوحدة ,
تحيتي :)
Thnx for your late answer. but every one response as his feeling. condation forgive me am logging from mobile , thnx again abo3omar_bido
زيزو باشا
الكلام ده موجود في تاريخ البشريه من اول خلق ادم لحد
يوم القيامه
انا بس صعبان عليا في كل الحكايه
القطه اللي هتموت نفسها دي
لا بجد
انت هايل يا صاحبي
بس هي دي الحياه
د/نورا
وعليكم السلام ورحمه الله وبركاته
حقيقي مبسوط بوجودك
وفعلا انا معاكي كل إنسان جواه شقين واحد لخير والتاني للشر وكذلك الحب والكراهيه
بس دورنا هنا بييجي إننا ازاي نعرف نخلي كفه من الاتنين ترجح .. ده بيعود لنفسيه الشخص .. وإرادته ودوافعه
وفعلا محدش بيبقي كويس علطول وإلا هيبقي عايش في المدينه الفاضله وهو الوحيد الي موهوم فيها .. ولو كان بيكره بس هيبقي فعلا مريض
وطبعا إحترامك لعملك بيزيديك وبيزيد الكل احترام في نظر الناس
شكرا علي تواجدك الجميل ورأيك الاجمل
ولاحرمنا الله من تواجدك
وفي إنتظار عودتك
تحياتي
برقوش
وعليكم اللم ورحمه الله وبركاته
أزيك يا برقش عامل ايه الحمد لله إنك بخير
بجد انا مبسوط جدا إن البوست عجبك وفهمته كويس
وانا برضه سعيد بمعرفتك جدا وأتمني أكون عند حسن ظنك فيا وظن الجميع
وربنا يرشدنا دايما للصلاح والهدايه
ولرؤيه الامور من زاويه اوضح
ربنا يخليك وأتمني أشوفك دايما منورني
تحياتي
تايه في سوط البلد
وعليكم السلام ورحمه الله وبركاته
أزيك يا جميل يارب تكون بخير
غرائز البشر لا تتبدل .. لكن لازم تفكيرهم يتبدل .. المفروض نستغل التقدم في إننا نسمو بتصرفاتنا وعقولنا .. مش نرجع لعصر الانسان الحجري
وفعلا ديه اول خطوه لازم ناخدها لطريق الصلاح
إننا نعترف بأخطائنا ونبطل تبقي اصواتنا من دماغنا في الغلط ومقتنعين إننا صح
يارب نقدر نفهم كويس ونبدأ بنفسنا
نورتني
تحياتي
المحارب الاخير
وعليكم السلام ورحمه الله وبركاته
معلش يا جميل إن البوست طويل بس لازم كان يبقي كده علشان توصل الفكره كامله
والاهم إن بعد طوله وصلك مغزاه ومحدش انه طويل
ربنا يصلح احوالنا جميعا
اهلا بيك في مجتمع المدونين ويلا مستنيين
موضوعاتك بشغف
تحياتي
تيمي
وعليكم السلام ورحمه الله وبركاته
ازيك يارب تكون بخير
ماهيه فكره واحده لكن متشعبه وليها اكتر من نتيجه ووجه
الحل قولته قبل كده نستخدم عقولنا ونفكر صح ونعترف بأخطائنا
ونقدر الامور صح ديه البدايه بعد كده الحلول لازم تيجي مننا
"لا يغير الله ما بقوم حتي يغيروا ما بأنفسهم"
مينفعش نحس باليأس والانهزاميه مهما حصل لازم نقف في وش الظلم ونقله لا والف لا
وإن كانت اخر نقطه دم فينا .. وأخر نفس جوانا
لازم نجتمع علي كلمه واحده .. وننحي الخلافات علي جنب ونبدأ نفكر إزاي هنغير الي بيحصل
والمشكله إن إفترافنا وبعدنا عن الاتحاد
بيزود الموضوع سوء
ومالك أمرنا مبسوط بده لإنه مش عايزنا نفهم ولا نوحد صفوفنا وموقفنا
علشان لو إتكلمنا
إنت فاهم الباقي
طبعا انا مخنوق جدا وأي حد دمه حر لازم يتضايق
ربنا يسمع دعاك ويفوقنا بقي زهقنا
ربنا يصلح احوالنا جميعا
نورتني يا تيمي ومعلش لو كنت إنفعلت
يارب تشرفني دايما
تحياتي
abo3omar_bido
أظن إن ردي عليك صح وكل واحد بيرد علي حسب إحساسه لكن انا فاهم إنت كنت تقصد ايه
علشان كده رديت عليك صح
أتمني يكون مقصدي وصلك ومايبقاش فيه زعل من وراه
نورتني
تحياتي
زيكا
ازيك يا جميل واحشني .. يارب تكون بخير
وفعلا الكلام ده كله من اول بدايه الخليقه .. لكن هنفضل لإمتي كده ؟؟
هنفضل نظلم نفسنا وبعضنا .. ونتظلم لحد أمتي ؟؟
كام واحد لازم يموت قدامنا .. كام واحد لازم يتهان .. كام واحد هيتسلب حياته وحريته علشان نحس
السؤال دلوقتي :
كام واد ممكن يتكلم
كام حد مقتنع ويقدر يقوي صوته مع غيره علشان نغير ونتغير
كام حد هيفضل خايف من الموت وهو مفيش أكتر منه
أتمني تكون فهمتني
يمكن القطه ديه ماتت علشان حسيت بالظلم ومرضيتوش علي نفسها . قطه دمها حر ههههههههههههه
أشكرك علي رأيك
وربنا يخليك
كل واحد فينا قادر يبقي هايل بس لو فهم نفسه صح .. وفكر صح
منورني يا ابو الزيك
وأتمني اشوفك دايما
تحياتي
عجبنى مقولة احمد ادم قالها فى برنامجه وكانت على النظافة
انه لوكل واحد نظف امام بيته بلدنا بجد هتبقى نظيفة
وبالمقابل لو كل واحد اهتم انه يبقى احسن واحد اخلاقيا ومهنيا برضه بلدنا هتبقى جميلة
السلام عليكم ورحمة الله وبركاته
بوست جميل وانت قولت كل حاجة بس افتكر حل كل المشاكل فى الدنيا دى اننا نرجع نعرف ربنا صح
إيه ياعم كل الغياب ده ؟ هو احنا ماوحشناكش ولا إيه ! ابقى طمني عليك يازيزو
إرسال تعليق