السلام عليكم
ازيكم جميعا يارب تكونوا بخير
كل سنه والجميع بخير
وسنه سعيده عليكم كلكم
وللمره مش عارف الكام بأجل في نفس الموضوع
للأسف لأني لسه ماخلصتوش
دعواتكم بالتوفيق من ربنا
هتكلم شويه عن السنه الي فاتت
المفروض كنت هقول الكلام ده في بدايه السنه
بس برضه إحنا لسه في اولها
السنه الي فاتت ديه كانت من اصعب سنين عمري
كان فيها أحداث كتير قوي
أكبر حدث كان في السنه ديه مرض والدي لفتره
ووفاه والدي الي فعلا عمر ماحدث اثر فيا زي الحدث ده
ومن وقتها لحد دلوقتي حاسس أحساسيس كتير
حاسس بحزن مدفون جوايا مهما فرحت ومهما ضحكت
وفي كل فرحه لازم افتكر وفي كل لحظه بفكر فيه
حاسس إن اكبر شيء في حياتي إتنزع
وحاسس كإني عجزت فعلا بعد ما كان فيا نشاط رهيب
وعزم وإستعداد لكل حاجه
دلوقتي حاسس إن إحساس العجز بيتسرسب جوايا كل شويه وبقي مالكني
وبقيت حاسس إن كل شيء صعب
وإني لسه صغير ومش عارف اعمل اي شيء .
الشيء العجيب إن واحد من أصدقاء طفولتي ومن أعز اصحابي واقربهم
إننا كنا في كل حاجه مع بعض حتي انا لما إنقطعت عن الدراسه سنه
هو نزل في الدراسه سنه برضه بقينا ماشيين مع بعض
الشيء العجيب إن والدي إتوفي يوم السبت و في الاسبوع الي بعده
ويوم السبت وصلني خبر وفاه والده ...
السنه ديه برضه هي نفس السنه الي ماكنتش عايز ادخل فيها الامتحانات
والي ذاكرت في اخرها و نجحت فيها صافي ...
ونفس السنه هي الي زعلت فيها مع إتنين من اصحابي القريبين جدا
ولسه ربنا ماأرادش إننا نكلم بعض تاني
والسنه ديه هي الي إتخرج فيها كتير من اصحابي الي من سني
منهم الي راح الجيش ومنهم إلي إشتغل بعد معاناه وحياه صعبه
2009 علي قد ماكانت صعبه وفيها حزن إلا إن كان فيها
اسعد شيء حصلنا في السنه كلها وهو ولاده ياسين إبن اختي
إلي رسم جوانا فرحه وخفف علينا جزء من حزننا علي والدي
في نفس السنه فقدت إنسان كنت بحبه قوي وكان مؤثر جدا في حياتي
وهو دكتور مصطفي محمود الله يرحمه
الراجل الي ماخدش حقه في حياته ولا حتي بعد مماته
ومحدش عرف بقيمته غير الجيل الي حضره
والناس الي عارفه قيمه الراجل ده ومدي علمه وثقافته وفقهه
ويوم جنازته مافيش اي تمثيل دبلوماسي زي جنايز الممثلين
والرقاصات وغيرهم من المشاهير الي مافادوش الدنيا بحاجه
بس حقهم مايهتموش براجل زي ده
لأن أي حد في البلد ديه عايزها تنهض ويقوي من عزيمة الشباب
ومن وعي الناس ويفهمهم إلي يفيدهم في دينهم ودنياهم وفي خلق الله
يبقي لازم يتهمش
بس فعلا اكتر كلمه عزتني ساعه جنازته
إن فعلا الحمد لله إن جنازته كانت خاليه من المنافقين
كلهم والحمد لله كانوا في إجتماع الحزب الوطني
السنه ديه بدأت اخد بالي من حاجات ماكنتش باخد بالي منها
وعرفت أحدد فيها هدف وبحاول امهد الظروف عشان احققه
وبدعي ربنا دايما بالتوفيق
في السنه ديه كسبت اصدقاء ومعارف كتير من التدوين ومن العالم الافتراضي
ومبسوط بجد إني عرفتهم لأنهم ناس محترمين
في نفس السنه الي عرفت فيها ناس من العالم الافتراضي
لقيت برضه ناس من العالم الافتراضي بعدت عني
وهما ماجي وصافي وجمال غابوا من غير تفسير
ومن غير أي شيء بعد معرفه داخله في السنه الرابعه
سنه عدت بكل ما فيها
يمكن اكون نسيت أحداث كتير
لكن بتمني في يوم أفتكر السنه ديه بذكري كويسه
وبتمني من ربنا إن السنه الجديده يكون فيها أمل
ويكون فيها خير لو ربنا مقدرهولنا
في نهايه السنه ديه بقول لأي حد يعرفني او يقرا كلامي
لو كنت زعلت حد بقصد او من غير قصد
لو إختلفت مع حد ومافهمنيش او مافهمتوش
لو كنت جرحت او ماقدرتش موقف حد
ولو أي حد بيكرهني او شايفني وحش
ماتزعلش مني
انا بحاول افهم كل واحد وبحاول اوصل لكل واحد بطريقته
ياريت كل واحد كمان يحاول ولو مجرد محاوله
إنه يوصلي بطريقتي
وكفايه إننا حتي لو إختلفنا وماحدش فينا إقتنع بكلام التاني
إن حوارنا وإختلافنا يكون شيء وعلاقتنا تكون شيء تاني
في النهايه بتمني الخير للجميع
ويارب تكون سنه سعيده علي الجميع
ويكون فيها حب وأمل وتفائل وتفاهم وإيمان
وصلاح ( دول صفات مش ولاد الجيران ) D:
ونقدر بجد نفهم بعض ونفوق بقي كفايانا
ضحكنا علي روحنا كتير وضحكنا كتير علينا
ربنا يستجيب مني ونعرف مره بقيمه نفسنا وقيمه بلدنا
وكل سنه وإنتوا طيبين
...................
الف الف مبروك للمنتخب المصري ولجمهور مصر كلها
علي فوز المنتخب المصري علي المنتخب النيجيري 3/1 لمصر
بجد فرحه كنا مستنينها
ويارب عقبال باقي الماتشات
وإن شاء الله ننتزع اللقب للسنه التالته
